Drug testing sa probinsya padayon
CEBU, Philippines - Moabot na ngadto sa 1, 431 ka mga empleyado sa gobiyerno ang napaubos sa drug test sa Cebu Provincial Anti-drug Abuse Office (CPADAO) karong tuiga.
Ang maong mga empleyado gikan kini sa walo ka mga munisipyo ug city hall sa lalawigan sa Sugbo nga gipaubos sa drug test gikan sa bulan sa Enero hangtod Abril 5 karong tuiga.
Ang 194 niini sa City of Naga, 91 sa Samboan, 82 sa Malabuyoc, 266 sa Ronda, 311 sa Dumanjug, 291 sa San Francisco, Liloan 196 ug San Remigio 310 ka empleyado.
Sa kapin usa kalibo nga na drug test, siyam ang nagpositibo sigon ni Ivy Durano-Meca ang pangulo sa CPADAO. Ang usa niini kagahapon lang nasakpan sa drug test nga gihimo sa San Remigio.
Samtang sa habig usab sa kapolisan, 1, 128 ka mga police personnel sa nagkadaiyang police units sa Cebu Provincial Police Office ug sa mga police stations sa probinsya sa Sugbo. Gikan kini sa dili momenus 20 ka mga police stations ang napahigayonan sa CPADAO og drug test gikan niadtong Enero.
Base sa record sa CPADAO, sa kapin usa ka libo nga na-screen, duha ka polis ang nagpositibo sa drug test. Ang maong polis gikan sa lungsod sa Compostela ug tourist cop sa Badian. (/IBM)(BANAT NEWS)
- Latest
