Korean, british gikawatan

CEBU, Philippines — Gikawatan ang usa ka Korean samtang nagkaon kauban ang iyang mga higala sa usa ka Korean restaurant sa dalan Escario, Kaputhaw, Dakbayan sa Sugbo niadtong Miyerkules sa gabii.

Ang biktima mao si Lee Jeonghon, 38, kasamtangang nagpuyo sa Cebu Study English School sa Barangay Mabolo.

Usa ka tawo ang giingong nisulod sa kan-anan ug nagpaka-aron-ingnon nga adunay katawag sa telepono.

Wala nabantayi sa biktima nga gikuha na ang iyang bag sa tapad nga lingkuranan ug lakip niini ang iyang cellphone, pitaka nga adunay P8 mil nga kwarta, Alien Certificate Card (ACR), Korean driver’s license, tulo ka credit card, assorted accessories ug usa ka gamay nga bulsita nga adunay P200 nga sinsiyo.

Samtang nakawatan sab ang usa ka British og kapin sa P10,000  niadtong Martes sa may Junquera Extension, Dakbayan sa Sugbo.

Ang biktima mao si Olivia Rose Hobson, 25, nagpuyo sa Teofel Pension House.

Matud sa biktima nga nisulod ang housekeeper sa iyang gipuy-an aron manglimpyo diin natandog ang bag niini ug nawagtang ang P10,000 samtang may nahabilin pa nga P11,000.

Imbestigahon pa sa kapolisan ang insidente sanglit unom ka tawo nga lalaki ug babaye ang nagpuyo sa maong kwarto. (Jomelyn B. Largado, CNU Interns) (BANAT NEWS)