PRO-7 uyon ipaubos sa SAF training ang bag-ong recruits
CEBU, Philippines — Uyon ang Police Regional Office-7 sa plano ni incoming Philippine National Police Chief Oscar Albayalde nga ipaubos og Special Action Force training ang mga bag-ong recruit nga mga polis aron nga mas disiplinado.
Matud sa tigpamaba sa PRO-7, Supt. Reyman Tolentin kinsa usa sab ka kanhi SAF commando, nga dili basta-basta ang training sa SAF ug giingong disiplina gyud ang numero unong gitudlo niini.
Plano ni Albayalde nga magtukod og tunghaan diin i-standardize ang SAF training ngadto sa mga bag-ong recruits aron nga mas disiplinado kini.
Gipasanginlan ang training sa Philippine Public Safety College (PPSC) nganong daghang polis ang simang sa ilang trabaho.
Mensahe ni Tolentin nga wala’y angay nga ikahadlok ang mga buot mosulod sa maong training.
“They should embrace this kind of development. It’s a way of challenge to overcome the training. To prepare them to any eventualities or situation nga manginahanglan sa ilang service,” si Tolentin niingon.
Nailhan si Albayalde nga estrikto sa pagpahigayon og surprise inspections sa mga estasyonan sa polis sa Metro Manila diin pipila na ang iyang gipangsuspenso human masakping nangatulog atol sa duty hours.
Niadtong Abril 5 gideklarar ni Presidente Rodrigo Duterte nga wala na niya lugwayi ang pagpanerbisyo ni outgoing PNP Chief Ronald “Bato” Dela Rosa ug gitudlo si Albayalde kinsa kasamtangang director sa National Capital Region Police Office (NCRPO) nga mopuli sa pwesto ni Dela Rosa.
Niadtong Enero pa unta moretiro si Dela Rosa apan gilugwayan sa presidente maong naabot siya hangtud karong buwana.
Moretiro na sab si Albayalde sa Nobiyembre 8, 2019 sa edad nga 56. (GMR) (BANAT NEWS)
- Latest
