Bag-ong ekipo Batok Cyber Crimes
CEBU, Philippines — Mga ekipo nga magamit sa pagsulbad sa cybercrime ug forensics gipresentar kagahapon atol sa Cyber Forensics Recovery and Investigations Conference.
Giangkon ni Supt. Jay Guillermo, tigpamaba sa Philippine National Police Anti-Cybercrime Group nga kuwang gyud og ekipo ang kapolisan sa pagsulbad sa mga kasong naglambigit sa cyberspace.
Gisegundahan sab kini sa chief executive officer sa Worldtech Information Solutions, Inc. nga si Robert Arquiza kinsa matud niya nga itandi sa mga first world countries, layo-layo pa ang apasonon sa Pilipinas kon cyber ang hisgutan.
Matud niya nga ang maong mga ekipo maoy makasubay sa kriminal nga nagpaluyo sa cybercrime.
Ang Worldtech Information Solutions, Inc., usa ka kompanya nga mobansay sa mga buot makat-on sa cyber-security, nakighugpong sa Meia Pico ug Data Expert sa pagpresentar sa mga ekipo nga maoy mosumpo sa cybercrime ug makatabang sa forensic.
Ang mga ahente sa National Bureau of Investigation ug Anti-Cybercrime Group sa kapolisan ang nipaubos na sa ilang pagbansay-bansay.
Usa sa mga produkto sa Data Expert mao ang Phone Forensics Express diin aduna kini kapasidad sa pag-retrieve sa mga data nga napapas na sa cellphone, laptop ug uban pa.
Adunay Anti-Drone Gear ang maong kompanya diin iseguro niini ang airspace. (GMR) (BANAT NEWS)
- Latest
