Kontrabando ipaagi og tunton

CEBU, Philippines — Usa ka surprise greyhound operation gipahigayon sa  mga sakop sa Bureau of Jail Management and Penology, Regional Special Operations Group ug Philippine Drug Enforcement Agency-7 sa Cebu City Jail kagahapon sa buntag.

Apan wala sila’y nakuhang ilegal nga drugas kondili 12 ka mga cellphone, 20 ka mga sigarilyo, deadly weapons ug lighter ang nasakmit atol sa maong operasyon. Gitug-an ni Jail Supt. Renante Rubio, Jail Warden sa Cebu City Jail gihimo kini human nakabantay sila og mga bag-ong pamaagi sa pagpalusot sa mga inmates sa mga cellphone ug sigarilyo.

Kaniadto iitsa sa mga tawo gikan sa gawas padung sa sud sa City Jail ang cellphone ug sigarilyo apan sa dihang gipatas-an ang koral ug gibutang og pukot  nakakita gihapon og laing mga pamaagi ang mga tigpalusot.

Gitug-an ni Rubio nga karon itunton na gikan sud padung sa gawas gamit ang nylon ug didto ihikot ang mga kontrabando.

Matud pa gituyo usab pagbutang og hugaw sa tawo ang nylon aron magduhaduha og kupot ang mga bantay.

Samtang si Konsehal Dave Tumulak, nitug-an nga makigtagbo siya sa mga nagpahigayon sa construction sa expansion sa jail facility aron malikayan ang posibleng paglusot sa mga lansang ug kabilya ngadto sa prisohan nga makahatag og risgo na hinoon dili lang sa mga priso apan apil na sa mga bisita. (IBM) (BANAT NEWS)