20,322 na ang patay sa drugas

Human nakiglalis tungod sa nagkalainlain nga mga ihap sa mga nangamatay sa kampanya ni Presidente Rodrigo Duterte batok sa ilegal nga drugas, nga gimantala sa Commission on Human Rights (CHR), ug sa ubang lokal ug kalibutanong Human Rights groups ug sa nagpakabana nga kahugpongan sa media, nipagawas ang Malakanyang sa iyang kaugalingon nga subay sa usa ug tunga ka tuig nga kampanya pinaagi sa yearend report sa 2017.

Uban ang pangangkon sa kadaogan batok sa ilegal nga drugas, gipagawas sa pamunoan ni Presidente Duterte ang labing makalilisang nga mga numero sa mga nangamatay.

* * *

Bisan sa tanang pagsuway sa Philippine National Police (PNP) ug ubang ahensiya sa gobiyerno sa pagpagamay sa ihap sa mga nangamatay, ang opisyal nga yearend report sa gobiyerno nibutyag og numero nga mas daghan kay sa gihulagway nilang iresponsable nga mga banabana sa Human Rights groups nga ila na gani nga gilambigit sa drug lords:

Niabot og 3,967 ang gidudahang mga durugista nga napatay sa operasyon sa kapolisan gikan sa Hulyo 1, 2016 ngadto sa Nobiyembre 27, 2017; ug 16,355 ang nangamatay sa mga kaso nga ubos pa sa imbestigasyon gikan Hulyo 1, 2016 ngadto sa Septiyembre 27, 2017.

* * *

Ang nakakuha og kopya sa yearend report dili ang mga kaatbang ni Presidente Duterte nga kapasanginlan nga nipaburot sa mga numero, kon dili, ang Korte Suprema kansang walo ka mahistrado gihulagway nga andam nga mohatag sa presidente og mayoriya sa bisan unsang kontrobersiya nga isang-at sa labaw’ng hukmanan.

Sa ato pa, lisud lalison ang paghulagway sa Korte Suprema nga nasubrahan ra kadaghan ang nangamatay sa kampanya ni Presidente Duterte batok sa ilegal nga drugas—20,322, o 39.46 ka patay sa matag adlaw, o 1.64 ka patay matag adlaw.

* * *

Mao ba ni ang nakapalisod sa PNP sa pagtuman sa kamandoan sa Korte Suprema? Kay ang bisan unsang pagsuway pagpahiyos sa gidaghanon sa nangamatay masukwahi sa opisyal nga mga numero nga gipagawas na sa opisyal nga yearend report sa gobiyerno?

Nga nakaabot sa Korte Suprema kining talagsaong kasayuran bisan sa wa pa motuman ang gobiyerno sa gipangayo nga mga dokumento sa kampanya batok sa ilegal nga drugas, labihan katulukibon. Nasipyat ba lang ang paghatag sa dokumento? O nilihok na ang Ginoo?

***

([email protected])