Bata napaig, 3 ka igsuon napaso

CEBU, Philippines — Napaig ang usa ka bata nga babaye ug nangapaso ang kalawasan sa tulo niya ka igsuon dihang nasunog ang ilang payag sa Barangay Marigondon, dakbayan sa Lapu-Lapu kaniadtong Martes sa gabii.

Si Fire Officer-1 Kaz Cuavo sa Lapu-Lapu City Fire Department  miingon nga si Mary Julian Castillano, 3-anyos, natulog diha nga miulbo ang sunog mao nga wala gyud siya maluwas. Nakaangkon og mga paso sila si Geraldine, 12, Mary Geralyn, 7, ug Dante Castillano Jr., 4.

Ang walo ka magsuon mao ra’y diha sa ilang panimalay pag-ulbo sa sunog, apan nagkatibulaag sila pagdinaganay ug nabiyaan ang bata nga natulog niadtong higayona.

Si Geraldine nga maoy kamaguwangan sa mga magsuon, miingon nga giitsa niya ngadto sa iyang lola sa ubos sa balay ang duha niya ka manghud ug naninguha gyud siya nga maluwas pa si Mary Julian, apan misilaob na pag-ayo ang kayo.

Guol kaayo si Geraldine, ilabi na nga apil siya nga nakaangkon og mga paso. Wala sa panimalay ang ilang amahan nga panday atol sa sunog, samtang bag-o lang nga namatay ang ilang inahan.

Wala mahibaw-i kon unsay nakaingon sa sunog nga wala may linya sa kuryente ang payag, ug migamit lang gani sila og solar sa pagpasiga sa ilang suga. Nangayo og tabang si Geraldine nga malubong ang iyang manghud.

Si Dante nga amahan sa mga bata miingon nga wala pa gani siya makabayad sa iyang mga utang sa pagkamatay sa iyang asawa dili pa lang dugay. (RUB) (BANAT NEWS)