2nd Governor's Cup Basketball kasado na

CEBU, Philippines — Mag-unay ang taga-isla gumikan kay ang Bantayan makigsangka batok sa silingan nilang Santa Fe sa pasiunang duwa sa 2nd Governor’s Cup Inter-Cities and Municipalities Under-21 Developmental Basketball Tournament karong Domingo diha sa Cebu Coliseum.

Ang duwa sugdan sa alas-3 sa hapon human sa bonggang seremonyas sa pagbukas, samtang ang Alcoy makigsangka sa Boljoon sa main game sa alas-5 sa hapon.

Atol sa pormal nga paglusad sa maong kalihukan kagahapon sa Golden Prince Hotel, si Cebu Provincial Sports Commission (CPSC) Executive Director Atty. Ramil Abing malaumon nga makaangkon gihapon sila og naglagiting nga kalampusan sama sa ilang naangkon sa una nilang season ilabi na kay mas daghan ang nangapil ning higayona.

“The Governor’s Cup basketball has created an impact to the sporting community in Cebu. We we’re really surprised by the attention we get. In fact, close to 20 players  got athletic scholarships from various schools after showcasing their talents in our tournament,” matud pa ni Abing.

“Given the bigger number of entries, we are looking forward to a more exciting and highly successful event this time,” dugang pa ni Abing.

Gikan sa 38 ka mga partisipanteng LGUs (local government units) niadtong 2017, miabot ngadto sa 45 ka teams nga gipangulohan sa defending champion Minglanilla Archangels ang magtige karong tuiga.

Ang walo ka bag-ong entrante mao ang Cordova, Daanbantayan, Tabogon, Tabuelan, Carcar City, Alegria, Santander ug Aloguinsan.

Magkumbati sa North Division mao ang Mandaue City, Cordova, Consolacion, Compostela, Danao City ug Carmen ubos sa North Bracket 1 San Francisco, Poro ug Tudela sa Camotes Island, Catmon, Sogod ug Borbon ubos NB2; Tabogon, Tabuelan, Bogo City, Balamban, Asturias ug  Tuburan  ubos  sa NB3 ug Santa Fe, Bantayan, Madridejos, Daanbantayan, Medellin, ug San Remigio ubos sa NB4.

Magpinaksitay sa South Division ang Minglanilla, Talisay  City, Naga City, San Fernando ug Carcar City ubos sa South Bracket 1; Sibonga, Argao, Dalaguete, Alcoy ug Boljoon ubos sa SB2; Oslob, Samboan, Santander, Ginatilan, Alegria ug Badian ubos sa SB3 ug Moalboal, Alcantara, Dumanjug, Barili, ug Aloguinsan ubos sa SB4.

Ang makampiyon mobulsa og P500,000, samtang ang mopahiluna sa ikaduha hangtod sa ikaupat ka dapit modawat og P300,000, P200,000, ug P100,000.