Kita sa bus terminal nikunhod
CEBU, Philippines — Nikunhod og P648,919 ang kita sa Cebu South Bus Terminal (CSBT) sa unang tulo ka buwan karong tuiga itandi sa susamang buwan sa niaging tuig.
Karon niabot sa P15.9 milyones ang kita sa CSBT itandi sa P16.6 milyones sa 2017.
Matud ni Joey Herrera, manager sa CSBT, nga kini gumikan kay wala nay nakuha nga deposit ang terminal gikan sa mga tenants.
Sa niaging tuig wala napuno ang tenants sa CSBT hinungdan nga nagpadayon sila og kuha sa mga mopwesto sa terminal diin nibayad kini og deposito sa mga stalls.
“So nakasulod na sila so naapil man gud diri ang income sa 2 months deposit. Didto nagkadeperensya og dako sa income last year ug this year kay karon nagpabilin pa man sila so walay deposit nga nasulod,” matud ni Herrera.
Niadtong Enero niabot sa P5.3 milyones ang kita sa CSBT, P5.2 milyones sa Pebrero ug P5.5 milyones sa Marso apil na niini ang P333,000 nga kita sa terminal fees niadtong Semana Santa. (GMR) (BANAT NEWS)
- Latest
