Westbrook mibida sa OKC
CEBU, Philippines — Si Russell Westbrook mikadlit og 21 puntos ug miposte sa ika-19 niyang triple-double karong season aron tabangan ang Oklahoma City Thunder pagbuntog sa San Antonio Spurs, 104-94, sa NBA kagahapon didto sa Chesapeake Energy Arena sa OKC.
Milangkat sab si Westbrook og 12 ka rebounds ug mipasa og 10 ka assists sa ika-98 nga triple-double sa iyang karera.
Si Jerami Grant midugang og 15 puntos, samtang sila si Corey Brewer, Paul George ug Alex Abrines nagkumboya og 36 puntos alang sa Thunder nga mi-inat sa ilang record ngadto sa 6-3 human sa All-Star break.
Dako sab og natampo si Nick Collison nga mikadlit sa tanan niyang siyete puntos sa kritikal nga sayes minutos alang sa Thunder sa katapusang kuwarter.
Sila si Rudy Gay ug Davis Bertans mihipos og 14 puntos matag usa alang sa Spurs, nga napilde kawalo sa katapusan nilang 10 ka duwa.
Samtang si LaMarcus Aldridge nalimitahan ngadto lamang sa 11 puntos human misipyat og 11 sa 16 niya ka itsa.
Didto sa Miami, si James Johnson mi-iskor og 20 sa dihang gipakuratan sa Heat ang Washington Wizards, 129-102.
Si Wayne Ellington mitali og 17 puntos , si Kelly Olynyk dunay 13 puntos ug 11 ka rebounds, samtang sila si Tyler Johnson, Rodney McGruder ug Josh Richardson parehong mipupo og 13 puntos sa Heat nga misanta sa lima ka sagunson nga daog sa Wizards. (BANAT NEWS)
- Latest
