Salag sa walhong kawsa

Misamot ang akong pagduda nga dakong salag gayud ang University of the Philippines sa kawsa nga gisagop sa mga rebeldeng komunista.

Kini human masikop ang usa ka batan-on nga babaye nga bag-o lang migradwar gikan sa maong tulonghaan ug kinsa giingon nga usa ka miyembro sa New People’s Army.

Si Myles Albasin, usa ka 21 anyos nga taga dakbayan sa Cagayan de Oro, mitapos sa kursong Mass Communications sa UP Cebu.

Sa iyang pag-eskwela dinhi sa Sugbo, usa siya sa lider sa Nagkahiusang Kusog sa mga Estudiyante, usa ka militante nga organisasyon sa mga tinun-an.

Nasikop si Albasin ug laing lima ka batan-on atol sa hiniusang operasyon sa kasundalohan ug kapolisan didto sa lungsod sa Mabinay sa lalawigan sa Negros Oriental kaniadtong Sábado sa kaadlawon. Sa ilang pagkaaresto, daghan usab nga mga armas ang na-recover sa otoridad.

Hinuon, dili na nato ikatingala pa kon daghan sa mga tinun-an sa UP ang makabig ngadto sa walhon nga kawsa. Sukad  pa man sa diktadorya nga pamunoan ni Ferdinand Marcos, hilabihan ka luag ang bakos sa maong tulonghaan kon student activism na gani ang hisgotan.

Gani, panahon sa mga lihok protesta batok sa kagamhanan, naanad na nga kanunay gayud nga mag-una ang mga aktibistang estudiyante sa maong unibersidad pagsiyaok sa kadalanan batok sa kahiwian sa mga opisyal sa gobiyerno.

Wala sila’y gisanto bisan kinsa pa man ang magdala sa renda sa pangagamhanan.

Hinuon, kabahin kana sa proseso sa demokrasya nga gisagop sa nasud diin libre ang tanan nga makapagawas sa ilang yangungo batok sa mga bugok sa kagamhanan.

Tungod lagi sa luag nga mga palisiya kabahin sa katungod sa mga tinun-an, wala gyu’y makababag kanila kon unsa’y ilang buhaton diha sa maong unibersidad.

Ang pribiliheyo sa halapad nga kagawasan sa mga estudiyante sa UP usahay gamiton usab sa dili maayo. Kini sama sa mga lakang paglumpag sa kagamhanan nga kasagaran diha maumol sa maong tunghaan.

Dili ba nga halos tanang mga militanteng grupo sa mga estudiyante diha man natukod sa UP? Ug usa usab sa mabasol ang tagdumala sa maong unibersidad tungod kay nawad-an na kini og kontrol sa mga tinun-an.

Mora ba’g nahisama na ang maong tunghaan sa sakyanan nga nawad-an sa brake ug delikado na nga madisgrasya. Pagkaanugon sa buhis natong mga yanong lungsoranon.