Car ban ug car pooling?

Una, adunay sugyot pag-ban o pagdili sa mga private cars sa dalan Natalio Bacalso during peak hours. Bright idea pagsulbad sa traffic congestion sa maong dalan.

Apan, unsa may ilang alternative alang sa liboan ka private car owners? Mag-unsa man ni sila during the peak hours, asa man sila paingon? Buot ba nila ipasabot nga sila na ang magbuot sa lakaw sa mga private car owners?

Unya, kinsa may manghatod sa mga anak ngadto sa ilang mga tunghaan, duna bay i-provide ang gobiyerno nga ilang kasakyan? Ug kadtong motambong sa trabaho, unsa may ilang kasakyan kon did-an na sila paggamit sa ilang sakyanan?

Pastilan, nagpasayon lang gyud ni sila pagsulbad sa traffic congestion sa atong dapit. Unta, kon unsa man nga solusyon ang masulod sa ilang utok, samtang maghatag og kasayon sa usa ka sector, at the same time dili unta maghasol sa uban.

Sama niining ilang solusyon sa traffic congestion sa dalan Natalio Bacalso diin ilang silotan ang mga private car owners. Ngano man?

Unya, alang nako, dili practical ang car pooling. Kon ila ning ipamugos, mag-Uber o mag-Grab na lang ang tanang private car owners, aron pirmeng dunay kauban ang mag-drive sa kotse.

Mao ba’y buot nilang mahitabo nga iniggawas nila gikan sa ilang mga panimalay, kinahanglan duna sila’y kauban sulod sa sakyanan? In my case, pananglitan, kinahanglan ba nga paubanon nako ang among maid aron duna ko’y kauban sulod sa kotse? Ug kon wala’y laing makauban nako, suroyon ba una nako ang among mga silingan pagpangita kinsa’y makauban nako? Ug kon wala’y makauban nako sulod sa sakyanan, dili na lang ko molakaw? Ngiga no?

OK, sugot ko nga ibilin nako ang akong sakyanan sa balay, basta pasakyon ko sa air-conditioned nga mga sakyanan sa atong mga konsehal.

Car ban ug car pooling? Lisud ni. Wala ba’y laing solusyon pagsulbad sa traffic congestion  sa atong kadalanan gawas sa pagsilot sa mga private car owners?

Husto ang mga sugyot nga unahon unta sa atong gobiyerno ang pag-provide sa mass transport facilities nga makahatag og kasayon o comfort sa mga sumasakay, before nga ilang silotan ang mga private car owners.

OK na man unta to ang Bus Rapid Transit (BRT), apan, gumikan sa politika, mao ra man og dili na madayon.

Busa, una sa tanan, sa dili pa nato hasulon ang mga private car owners, ihiklin una nato ang politika, ug dalion ang pagpahigayon sa komportable nga mass transport system.