Ugma nga wa’y sakyanan

Samtang nagplano ang atong lokal ug nasudnong mga opisyal sa pagpalapad sa kadalanan ug pagpangita og bag-ong mga agianan sa mga sakyanan aron pagsulbad sa nagkagrabe nga problema sa kahuot sa trapiko, lahi na ang panglantaw sa mga tagdumala sa labing dagkong mga dakbayan sa ubang kanasuran.

Inay ipadayon ang mga pagtuon unsaon sa pagpaigo ang nagkadaghan nga mga sakyanang pribado ug pamasahero sa gipalapdan ug gisapaw-sapaw na nga kadalanan ug mga taytayan, ilang nahukman nga mas maayong mag-umol sila og ugma alang sa mga molupyo, ugma nga hingpit na nga molingkawas gikan sa mga sakyanan.

* * *

Ambot kon nag-una ba lang siya og kahibawo sa mga balita sa mas malambuon nga mga dakbayan, o niliwat lang si Tommy Osmeña sa iyang amahan nga si Serging, kinsa nakalantaw og ugma sa Sugbo nga wa makit-i sa kasarangang mga Sugbuanon.

Samtang kasagaran sa atong katiguwangan nakakita lang sa pagatpatan sa isla sa Mactan, si Serging nakakita og taytayan ug tugpahanan.

Samtang ang iyang mga kaatbang nakakita lang sa kalapokan, si Tommy nakakita sa South Road Properties (SRP). Nakalili ba sab siya sa ugma nga wa na’y sakyanan?

* * *

Karong semanaha, ang labing taas nga hukmanan sa Germany nipatigbabaw sa gahum sa mga dakbayan pagdili sa mga sakyanan gikan sa kadalanan.

Sugod karong tuiga, ang dakbayan sa Stuttgart, pinuy-anan sa Mercedes-Benz ug Porsche, mo-ban na sa karaang mga sakyanan.

Nakauna pagpahamtang sa pagdili ang Berlin, ulohan sa Germany, niadtong 2008. Ablihan sab sa Berlin karong buwana ang 12 niya ka super-highways nga alang lang sa mga bisikleta.

* * *

Ang Oslo modili sa tanang sakyanan sunod tuig, mosunod ang tibuok Norway sa 2025. Ang Madrid, ulohan sa Espanya, modili sa mga sakyanan sa 202 ka ektarya nga city center sa 2020.

Mohimo sa ilang kadalanan nga mas haum sa paglakaw ug pagbisikleta ang Hamburg ug Copenhagen. Ang Paris ug London mo-ban sa diesel cars ug modoble sa ilang bike lanes.

Pedestrian-only na ang lapad nga shopping district sa Brussels. Ang Mexico City mo-ban sa duha ka milyon ka sakyanan gikan sa city center.

Ang San Francisco mo-ban sab sa mga sakyanan gikan sa 200 ka kilometro niyang bike lanes.

* * *

([email protected])