Ravena kaduha na misidlak isip‘Player Of The Week’

CEBU, Philippines — Ang rookie nga si Kiefer Ravena mipakita na sab og maanindot nga salida aron mamahimo nga labing unang player nga nakadaog og duha ka PBA Press Corps Player of the Week awards karon nga season.

Ang 24-anyos nga pambato sa NLEX mo-average nga 16.5 points, 7.0 assists, 6.5 rebounds ug 1.5 steals sud sa 29 minutos sa dihang gipilde sa Road Warriors ang Meralco Bolts ug Alaska Aces sa imaging semana.

Nagpakita sa kalidad sa usa ka beterano, gitabangan ni Ravena ang NLEX nga makabangon  human malubong og 18 puntos ug dayon mipasud sa game-winning basket sa makutas nilang kadaogan batok sa Meralco, 87-85.

Gibansagan og ‘Phenom’, ang no. 2 overall pick sa 2017 PBA Rookie Draft mitapos uban ang 21 puntos human mipasud og pito sa 12 niya ka itsa uban ang pito ka rebounds, upat ka assists ug usa ka steal.

Duha ka gabii ang milabay, si Ravena miiskor og 12 puntos, 10 ka assists ug  pito ka rebounds sa 95-89 nilang kadaogan batok sa Alaska.

Si Ravena milansang og duha ka krusyal nga free throws sa katapusang otso segundos aron  silyohan ang ikatulong sunod-sunod nga daog sa NLEX ug ikalima sa kinatibuk-an sud sa siyam ka duwa.

Gipukan ni Ravena sa maong pasidungog mao ang iyang teammates nga sila si Kevin Alas ug  Larry Fonacier, LA Tenorio, Japeth Aguilar ug Greg Slaughter sa Ginebra, Jeff Chan ug Matthew Wright sa Phoenix, JP Erram ug Mike DiGregorio sa Blackwater ug Raymond Almazan sa Rain or Shine. (BANAT NEWS)