EDITORYAL - Junction box

Gawas sa estrikto nga pagpanakop sa mga driver nga mosugat sa trapiko, gipahibalo sa kadagkoan sa CITOM nga ila na usab nga pangdakpon kadtong mga driver nga sa dugay’ng katuigan, mibaliwala ra sa balaod kabahin sa junction box. Nabantayan nga kon estrikto lang gyud ang pagpatuman sa balaod, mahadlok gyud ang mga motorista. Bisan gani og dili lang tanggongon og usa ka buwan ang sakyanan nga masakpang gamiton sa pag-counterflow, siguradong mahadlok na ang mga motorista kon usbawan lang ang multa ug himoong P5,000.

Adunay ordinansa nga mopahamtang og multa nga P1,000 sa mga motorista, kang kansang sakyanan, maabtan nga naa sulod sa Juntion Box kon GO na sa pikas nga karsada. Apan ang mga driver wala mahadlok nga molapas niini kay wala man estriktoha sa pagpatuman. Angay nga himoan og ordinansa nga ang sakyanan nga mo-counterflow ang driver, tanggongon hangtud nga makabayad kini og P5,000 nga multa. Dili sayon pangitaon ang maong kantidad sa kinabag-ang katawhan, ug sigurado nga sila magmatngon gyud nga dili madakpan.

Daghan ang nagbagulbol sa Executive Order ni Mayor Tomas Osmeña nga magpatanggong sa sakyanan sulod gyud sa usa ka buwan ug wala’y multa nga ipabayad gikan sa mga tag-iya. Aron nga mohunong na ang mga kritiko sa mayor sa pagsaway sa iyang pamaagi sa pagpa-impound sulod sa usa ka buwan, angay’ng irekonsiderar sa mayor ang iyang kamandoan.

Total ang kamandoan sa mayor nga tanggongon ang mga sakyanan sa mga motorista nga masakpang mag-counterflow, gitumong man aron nga mahadlok ang mga driver ug dili na moabuso sa ilang pagmaneho. Kon estrikto lang ang pagpatuman sa balaod, mahadlok gihapon ang mga driver, ilabi na kon dagko ang kantidad sa multa.