Kamot sa imahen ang nakuptan
CEBU, Philippines — Mga residente sa Barangay Pasil, mosaulog gihapon sa pista sa Senyor Sto. Niño bisan pa man sa trahedya nga ilang nasugatan kay matud pa nila angay ipasalamat nga walay kinabuhi nga nakalas.
Matud pa ni Rosalinda Arsenas, usa sa mga nasunugan, nga tuyo unta niyang alsahon ang ilang washing machine apan susama og adunay nipugong niya pagawas, hinungdan naglibog siya unsa iyang bitbiton.
Sumala pa ni Arsenas, mogawas na unta siya pagkakita sa kalayo apan nalamba siya ug kaduha tungod sa mga mantika sa kaha nga nayabo sa ilang balay. Matud niya sa paninguha niyang makabarog maoy iyang nakuptan ang kamot sa imahen sa Senyor Sto. Niño nga matud niya sa iyang paghangad daw nagkatawa kaniya.
Dali siyang nibangon ug paspas kaayo siyang nakagawas ug sa pag-abot niya sa luwas nga lugar, ang imahen ra iyang nabitbit apan nalipay siya pagkakita nga kompleto ang iyang banay.
Gibutyag ni Arsenas, bisan og nawagtangan sila og panimalay magsaulog gihapon sila sa pista.
Gipahibalo ni Arsenas, atol unya sa fluvial procession iyaha gyung bitbiton ang ilang imahen ngadto sa dagat sa pag-agi niini diha sa ilang lugar.
Samtang si Fr. Joemar Bacucang, usa sa mga pari sa Don Bosco Center mapasalamaton gihapon sa Kahitas-an kay bisan pa sa kadaot nga nahitabo sa ilang buhatan walay mga nakalas nga kinabuhi. (BANAT NEWS)
- Latest
