Kelan pa ba? Angelica ‘di pa kayang ma-in love ulit, wasak pa rin sa ginawa ni John Lloyd!

Ayon kay Angelica Panganiban, hindi pa raw siya ready na magmahal ulit pagkatapos ng nakaraang relasyon. Aniya ay takot pa raw siya ngayon at gusto niya, ‘pag nagmahal siya ulit ay ‘yung kaya na niya ulit ibigay nang buong-buo ang sarili niya.

Relate na relate nga raw ang aktres sa role niya bilang Cindy sa Ang Dalawang Mrs. Reyes na tanga sa pag-ibig at laging pinagsisilbihan ang asawa dahil ganu’n din daw siya magmahal in real life kahit na nga ba in the end ay nasaktan din siya.

Pero aniya, ayaw naman daw niyang ma-trauma at sa next relationship niya ay ganu’n pa rin naman daw ang gagawin niya sa taong karapat-dapat.

Unfair naman daw kasi kung dahil lang sa hindi naging maganda ang ending ng past relationship niya ay magkakaroon na siya ng limitasyon sa susunod niyang mamahalin lalo na kung deserving naman ang guy.

Si John Lloyd Cruz ang huling alam ng publikong nakarelasyon ni Angelica na balita ngang magiging tatay na dahil nga nagdadalangtao diumano ang rumored girlfriend na si Ellen Adarna at may tsika ring malapit nang ikasal ang dalawa.

Robin ayaw sirain ang Hollywood dream ni BB!

Si Robin Padilla pala ang isa sa mga nag-encourage kay BB Gandanghari para ipagpatuloy nito ang Hollywood dream sa US.

Matatandaang naglabas si BB sa kanyang Instagram account ng mahabang liham kung saan ay ikinuwento niya ang struggles niya sa US para lang matupad ang pangarap niyang mapasok ang Hollywood.

Ayon kay Binoe, aware naman daw siya sa lahat ng pinagdaanan ng kapatid.

“Eh ako ang barkada nu’n, eh, ni BB. Alam ko ‘yung kanyang struggles, eh. Eh sabi ko naman sa kanya, ‘alam mo tol, huwag kang ma-anuhan ng kalooban. Dahil sa Hollywood talaga, ganyan lahat ang istorya ng nagbida do’n, nahirapan, nagtrabaho, lahat ng nag-artista ganyan. Eh gusto mo ‘yan, eh, trip mo ‘yan, eh. Pangatawanan mo.’ Pinapangatawanan naman niya,” pahayag ni Binoe.

During those times ay siya ang parating nagbibigay ng lakas ng loob sa kapatid.

“Ako ‘yung laging nage-encourage sa kanya noon, ‘sumulat ka, magsulat ka kung ano ‘yung mga nararamdaman mo’.”

Pero recently daw ay nagkatampuhan sila na hindi na niya ikinuwento kung bakit.

Pero siyempre, anu’t anuman willing daw s­iyang suportahan ang kapatid kung hihingi ito ng kanyang tulong.

“Oo naman, lalo si Mariel (Rodriguez, his wife), araw-araw silang magkausap. Si Mariel ang barkada nu’n, eh.”

Bagama’t mahirap ang buhay sa US, ayaw naman daw niyang payuhan si BB na itigil na ang ambisyon at umuwi na lang sa Pinas.

 “Para sa akin, pag ginawa ko ‘yun, para ko siyang siniraan ng loob. Trip niya ‘yun. Wow, hindi ko babasagin ang trip niya. Kanya-kanya tayo ng. . .lalo na siya, may edad na siya. Tuloy lang, hangga’t kaya mong pangatawanan ‘yan, tuloy mo. Pag hindi mo na kaya, eh desisyon mo na ‘yan,” sey pa ni Binoe.

Samantala, balik-teleserye ang aktor sa ABS-CBN via Sana Dalawa ang Puso with Jodi Sta. Maria and Richard Yap. Sey nga niya, as much as possible nga raw ay ayaw niyang gumawa ng soap opera dahil nga mahirap dahil puyatan at ngaragan ang taping. Pero nakapangako na raw siya kay Malou Santos ng Star Creatives na gagawa siya ng teleserye at may isa raw siyang salita bilang isang Muslim at isang lalaki.

May ginagawa raw siya ka­sing pelikula, ang Bad Boy 3 at alam niyang pag gumawa siya ng soap ay baka hindi na matapos ang movie. Pero siyempre, nahiya naman daw siya kay Malou kaya finally ay sumige na rin daw siya.