Magpabuto sa armas, hepe relibohan
CEBU, Philippines — Gihulga sa Police Regional Office-7 ang mga hepe sa matag police station nga pangrelibohan kun dili pahugtan ang kampanya batok sa pagpabuto og mga armas panahon sa pagsugat sa Bag-ong Tuig.
Ang tigpamaba sa PRO-7, Supt. Reyman Tolentin, nibutyag nga nihatag og direktiba si PRO-7 Director, Chief Supt. Jose Mario Espino, ngadto sa mga hepe nga kun moabot og tulo ka kaso nga dili masulbad sa nabiktima sa saag nga bala sa ilang area of responsibility, hayan relibohan sila sa katungdanan isip hepe.
Si Tolentin niingon sab nga kun aduna silay madawat nga reklamo kabahin sa mga polis nga magpabuto og armas panahon sa pagsugat sa Bag-ong Tuig, paimbestigaran sab dayon kini ug hayan marelibohan.
Nasayran nga wala gipataptapan ni Police Director General Ronald “Bato” Dela Rosa ang mga muzzle sa service firearms sa kapolisan aron pagpakita sa dakong pagsalig niya sa mga polis nga dili magpataka og pabuto ilabi na sa pagsugat sa Bag-ong Tuig.
Ipa-embargo sab sa polis ang mga ilegal nga mga pabuto sama sa piccolo, giant kwitis ug uban pa.
Gidasig ang kapolisan nga magronda sa mga lugar diin gikatahong daghan gyung magpabuto isip tradisyon sa pagsugat sa Bag-ong Tuig.
"Ato na ipa-implement for the primary purpose of public safety," matud ni Tolentin. (BANAT NEWS)
- Latest
