Nabawo ni Wilma

Labihan ang kalibog sa mga eksperto sa Philippine Atmospheric, Geophysical and Astronomical Services Administration (PAGASA) sa umaabot nga bagyo nga si Wilma:

Mahimo ba nga bagyo; makasulod ba karong tuiga; motugpa ba sa Sugbo; moungot na sab sa Mindanao; o hingpit nga mabungkag ug dili na makahasol sa pagsugat sa Bag-ong Tuig?

Matud ni PAGASA Visayas Director Oscar Tabada nga ang kanhi low pressure area (LPA) gawas nga nabungkag gahapon sa kadlawon tungod sa ikog sa cold front ug bugnaw nga hangin nga Amihan, niungot pa gyud kapin sa 2,000 ka kilometro gikan sa silangan nga Mindanao.

* * *

Tungod sa pagka-umol, pagkabungkag, pagka-umol ug pagkabungkag na sab sa mga panganod ibabaw sa Pacific Ocean nga nagdanga-danga sa Philippine Area of Responsibility (PAR), nag-usab-usab ang forecast sa PAGASA:

Gitakda nga mosulod si Wilma sa PAR niadtong Disyembre 28 ug mosaka sa Luzon; giingon nga LPA pa nga mosulod sa PAR karong Disyembre 31;

Dayon gitakda nga mosulod karong gabii ug moigo sa amihanan nga Bohol ug Metro Cebu karong Enero 1, 2018; ug

Gipangagpas na sab nga, sama ni Vinta, mo-ungot sa Mindanao.

* * *

Sa pakighinabi sa Arangkada sa DYAB Abante Pa, Bisaya!, giisa ni Tabada ang gamay nga kahigayonan nga inay mosulod si Wilma, ang ika-23 ug kataposan nga bagyo sa nasud sa 2017, unya na siya mosulod human sa Enero 1 ug mahimo nga labing una nga bagyo sa Bag-ong Tuig 2018 ug nganlan kini og Agaton.

Ma-bagyo man o dili, nipasidaan si Tabada nga uwanon ang weekend sa Sugbo ug Kabisay-an, ug kusog nga uwan ang mahiagoman sa adlaw gyud sa Bag-ong Tuig karong Lunes.

* * *

Gipaneguro hinuon ni Tabada ug sa ubang kadagkoan sa PAGASA nga dako nga bakak ang nikatap sa social media nga super typhoon ang umaabot nga katalagman.

Napan-os na ni nga pangilad kay gipamugos sa dayong abot sa mga bagyo nga Urduja ug Vinta ug karon gipasiuna na sab ni Wilma.

Husto ang tambag ni Baltazar Tribunalo, pangulo sa Cebu Provincial Disaster Risk Reduction and Management Council: Dili ta angay nga matarantar; apan dili sab angay nga mokumpiyansa.

Sa pagsugat sa 2018, dili ta maghigwaos, apan dili sab mangiyugpos.

([email protected])