Motor nisampak sa truck, driver patay

CEBU, Philippines — Usa ang patay sa panagbangga sa motorsiklo ug six-wheeler truck sa Barangay Catmondaan, Lungsod sa Catmon niadtong Martes sa alas kwatro sa hapon.

Ang nakalas mao ang drayber sa motorsiklo nga giila nga si Bon Mark Good, 19, taga Lungsod sa Carmen samtang ang nagmaneho sa truck mao si Joselito Ponce Laude, 53, taga Perrelos, Dakbayan sa Carcar.

Base sa inisyal nga imbestigasyon ni PO1 Gemmar Arigo sa Catmon Police Station nga adunay nakasaksi nga kusog kaayo ang padagan ni Good kinsa nisuway og overtake sa gisundan niining Ceres Bus.

Apan dihang naabot kini sa usa ka kurbada, wala na niini nakontrolar  ang iyang motor ug nibangga kini sa kasugat nga truck nga gimaneho ni Laude nga nagkarga og mga lawog sa kahayopan paingon unta i-deliver sa Lungsod sa Tabuelan.

Maayong pagkapantok sa ulo niini didto sa sementadong karsada ug nalatayan gyud ang tiyan niini sa mga dagkong ligid sa truck.

Gawas nga nalatayan ang lawas sa biktima, nagusbat sab ang gimaneho niining skeleton nga motor samtang nalumping ang atubangang bahin sa truck tungod sa kakusog sa impact sa panagbangga.

Gisuwayan pagdala sa Catmon Responders ang biktima ngadto sa Juan Dosado Memorial Hospital sa Lungsod sa Sogod apan gideklarar kini nga patay na ni Dra. Lovelyn Blancas.

Nasuta sab nga wala’y lisensya ang motor ingon man ang nakalas.

Gawas niini, si Arigo nibutyag nga wala sab magsul-ob og helmet ang biktima.

"Dili hubog ang biktima but matud pa sa family kay kusog gyud ni magpadagan," matud sa imbestigador.

Wala gipasakaan og kaso sa kabanay sa biktima ang drayber sa truck apan nangayo lang sila og hinabang sa operator sa maong truck.

Matud ni Arigo nga gihatagan ang pamilya sa namatay og P30 mil. (BANAT NEWS)