Mag-ex na loveteam alang-alang na lang sa career ang pagpapakilig!

Nakausap namin ang aktres na ka-love team ng isang guwapong aktor at nakarelasyon pa. Sa pananalita nito at sagot sa mga tanong tungkol sa kanila ng ka-love team ay mukhang hindi na niya mahal ang aktor.

Wala na ang kilig tuwing binabanggit ang pa­ngalan ng aktor at wala na rin ang kislap sa mga mata niya.

Sana, tanggapin ng fans ng magka-love team na bilang magkapareha na lang ang ugnayan nila at kung magpapakita man ng sweetness on cam ay dahil ‘yun sa projects nila together.

Sabagay, nauna pa yatang ma-fall out of love ang aktor. On cam na lang ito sweet sa ex-GF at off cam ay kani-kanya na sila ng buhay. Binabanggit na ng aktor ang mga crush niya na dati ay never ginawa.

Isa pang napapansin ng mga nakakausap ng ex-couple, nababanggit na nila ang flaws ng bawat isa na dati naman ay tanggap nila.

Heto pa, wala na silang maisip na iregalo sa bawat isa ngayong Pasko, kaya ‘wag umasa ang fans na magpapalitan ng regalo ang magka-love team.

Marian ginastusan ang party ng Super Ma’am

Sa mga photos sa Christmas party ng shows ng GMA 7, ang party ng Super Ma’am ang pina­kabongga. Sit down dinner ang naganap at may pa-banda pa with catering na naka-uniform ang waiters.

Sa tweet ni direk LA Madridejos na “Missed #Supermaam Xmass party. Would like to thank Marian Rivera dahil sobrang generous nya sa lahat. As in!”

Tama ba kami sa naisip na si Marian ang nagpa-party para sa kanyang mga kasama sa Super Ma’am? Siguradong may dagdag na regalo si Ma­rian sa mga kasama sa action/fantasy series na baka umabot pa raw ng February 2018.

Samantala, kung may bagong papasok na karak­ter sa Super Ma’am gaya ni Gil Cuerva na gaganap na zombie, may mawawala rin sa mga karakter. May nag-tweet sa cast member na nag-taping sila sa isang memorial park dahil may namatay na karakter.

Bagong show nina Mikoy at Mikee may pa-animation

Nakita namin si Mikoy Morales sa isang coffee shop kasama si Juancho Trivino. Close pala ang dalawa at sinamahan lang ni Mikoy si Juancho na on call sa taping ng All-Star Videoke.

Naikuwento ni Mikoy na sa January 21, 2018 na ang pilot ng Sirkus, ang weekly show nila ni Mikee Quintos na papalit sa Roadtrip. Si Zig Dulay ang director na produced ng GMA News & Public Affairs. Tuwang-tuwa si Mikoy na ipinalalabas na ang teaser ng show na masaya raw gawin.

Kambal ang role rito nina Mikoy at Mikee at kabilang sa makakasama nila si Cherie Gil.

“Family-oriented fantasy series” ang description sa Sirkus. Big production ito with high quality animation at very glossy. Buhay ng mga nagtatanghal sa circus ang tema ng show.

Dahil sa MMFF, JC first time sa Baguio

Sayang at hindi namin nalapitan si JC Santos sa premiere night ng Meant To Beh. Itatanong sana namin kung ano ang feeling na mapanood ang sarili sa pelikula kasama sina Vic Sotto at Dawn Zulueta.

Gaya ni Gabbi Garcia na first time mapasama sa MMFF movie, excited din si JC na sumama sa Parade of Stars kahapon at dumalo sa Awards Night sa December 27.

Isa pa palang lubos na ikinatuwa ni JC na napasama siya sa Meant To Beh ay finally ang makarating sa Baguio. Considering na taga-Pampanga si JC pero never pa pala itong nakarating ng Baguio.