Davide ug Osmeña wa nay kapilian pa

Si Mayor Tomas Osmeña ug si Gobernador Junjun Davide na lang ang nahibilin nga Liberal Party dinhi sa Sugbo. Kini human nagdungan og tapon ang mga politiko – incumbent o napilde sa miaging eleksiyon – ngadto sa PDP-Laban atol sa mass oath taking sa Plaza Independencia karong adlawa. Ang mass oath-taking gi-organize sa Bisaya Na Pud movement. Kini nga grupo gitukod ni Mike Dino, ang presidential assistant for the Visayas karon ug maoy nagsilbe nga chairman emeritus niini.

Sa dihang mipahibalo ang mga mayor nga motapon na sila sa PDP-Laban, si Davide mipaklaro nga magpabilin siya sa LP. Si Tomas usab nagtuyoktuyok og pangita og “taytayan” ngadto ni Presidente Duterte aron makig-estorya, apan wala g’yud kini maka-audience sa presidente, mao nga makuli nga makasaka siya sa entablado sa PDP-Laban karong adlawa sa Plaza Independencia.

Dalayegon ba ang desisyon ni Davide? Depende. Apan ning mga panahona, ang LP giisip nga usa ka patay nga partido. Wala’y politiko nga ganahan makig-alyado sa mga higante sa LP, sama nilang Bise Presidente Leni Robredo, mga Senador Kiko Pimentel ug Frank Drilon, ug Risa Hontiveros.

Pananglit eleksiyonon karong adlawa, si Davide na lang ang magtikawtikaw sa LP? Sa kang Tomas, ang sayop niya nga mga desisyon ang nakaingon nganong magpabilin siya sa LP. Nasayop siya nga didto siya misandig sa duha niya ka higala nga silang Cabinet Secretary Jun Evasco ug minero nga si Ding Borja.

Napakyas si Tomas sa iyang intelligence info pagpakig-alayon kang Evasco. Si Evasco naghimo’g kaugalingon niyang “little kingdom” nga gitawag og Kilusang Pagbabago nga gikaintapan sa ubang mga politiko tungod sa pagbuotbuot og panuok sa mga kapitan.

Ang Kilusang Pagbabago wala makadikit sa PDP-Laban. Apan si Tomas nasayop og kuwenta. Nagtuo siyang ingon niana na kadako ang Kilusang Pagbabago nga sa mga rally, kuli na kaayong maporma ang usa ka libo ka tawo, bisan matud pa sa inpormasyon nga atong nadawat daghang mga negosyanteng nagsuporta niini.

Ang agbay-agbay ni Tomas kang Evasco wala makadala kaniya ngadto kang Duterte. Sa atong estorya nga nakuha, si Borja wala na tagda kay nasuko si Duterte nganong iyang gidala ang negosyanteng si Peter Lim didto sa Davao ug gipaatubang niya.

Adunay inpormasyon nga giduol ni Tomas si Gobernador Jose “Pepito” Alvarez sa Palawan ug mihangyo nga magpatabang aron maka-audience kang Digong. Apan mura’g wala siya tabangi ni Alvarez. Para nako, sila si Davide ug Tomas wala na’y kapilian gawas sa pagpabilin sa LP. Ang “Hobson’s choice” nila nga partidong kabinlan mao ra g’yud ang LP. Sa inengles pa, “take it or leave it.”