MCPO motorcycle cop mogukod sa mga kriminal

CEBU, Philippines — Gilusad sa Mandaue City Police Office ang Motorcycle Tactical Response Unit batok sa mga kriminal nga magsakay og motorsiklo.

Si MCPO Director, Senior Superintendent Roberto Alanas, niingon nga ang MTRU ang gilangkuban sa 18 ka motorcycle-riding policemen nga naggamit og high-speed nga motorsiklo nga adunay kahimanan sa taas ug mugbo nga matang sa armas ug hand-held radios, handcuff ug bullet-proof vests.

Tuyo sa maong mga polis ang pagpatrolya sa nagkadaiyang dapit sa dakbayan sulod sa 24-oras diin duha ka hugna nga on-duty ang elite nga polis.

Ang maong mga polis gibansay sa pagpusil nga gigamit ang tag-as ug mugbo nga matang sa mga armas bisan magdagan ang motorsiklo.

Gipasabot ni Alanas nga ang high-speed motorcycles sa kapolisan ang gikan sa ulohan nilang buhatan sa Philippine National Police.

Natala sa MCPO nga mga krimen nga binuhatan sa nagsakay og motorsiklo gikan sa Hulyo 2016 hangtud Nobiyembre niining tuiga ang 64 ka kaso diin 16 ang pagpatay, 16 ang pagpangawat, 22  ang pagpanulis, unom ang pagpamun-og ug upat ka pagpanglugos.

Si Alanas niingon nga ang ilang paglusad sa MTRU gisuportahan sa kagamhanan sa dakbayan. (BANAT NEWS)