Hepe sa MCPO Station 3 ipatawag sa CHR

CEBU, Philippines — Ipatawag sunod semana ang hepe sa Station 3 sa Mandaue City Police Station sa Commission on Human Rights aron patubagon may kalabutan sa kamatayon sa tulo ka managsuon nga Ompad kinsa giingong namatay sa operation sa kapolisan sulod sa Cebu International Convention Center.

Matud ni Leo Villarino, chief investigator sa CHR-7, nga bisan og wala nay tinguha ang inahan sa managsuong Ruben, Jerome ug Vincent Ompad nga mopadayon sa pagpangita og hustisya sa ilang kamatayon, ila gihapon ipadayon ang imbestigasyon nga ila na nga nasugdan.

Sumala pa ni Villarino nga karong semanaha ilang ipadala ang subpoena sa hepe sa Station 3 aron motunga sa ilang buhatan sunod semana.

Matud ni Villarino nga maoy ilang tinguha nga masayran ang tibuok nga panghitabo tungod kay tulo gyud ang nakalas kinsa dili pa dugay nakagawas sa prisohan. (BANAT NEWS)