Lolo namusil, laing usa nanunggab sa kapuyo

CEBU, Philippines — Nagtingkagol sa detention cell sa Police Station 2 sa Lapu-Lapu City Police Office (LLCPO) ang 75-anyos nga lalaki nga suspek sa pagpamusil sa iyang silingan sa Elenville 1 Subdivision, Barangay Mactan alas 7 pasado sa niaging gabii.

Si Police Officer 1 Crismenio Ariola niila sa suspek nga si Willie Beralde Brillante ug ang biktima mao si Changlee Apa Villaros, 25, nagtrabaho isip production clerk sa usa ka establisemento sa maong dapit.

Matud ni Ariola nga diha sa gawas sa ilang panimalay ang biktima dihang kalit lang gipusil sa suspek ug may swerte pa nga wala naigo ug nakadagan sulod sa ilang panimalay.

Wala pa natino sa kapolisan ang hinungdan sa kasuko sa suspek ngadto sa biktima.

Dugang ni Ariola nga dali nga nakapangayo og panabang sa ilang buhatan ang biktima ug dihang ilang gitubag ang maong alarma ilang naabtan ang suspek nga nagbarug pa sa gawas sa ilang panimalay nga nagdala sa armas nga kalibre .9mm pistol.

Attempted murder ang giandam nga kaso batok sa suspek.

Samtang usa ka 60-anyos nga lalaki ang nanunggab og kapuyo gumikan sa selos sa wala pa matinong hinungdan sa Nangka, Lungsod sa Balamban niadtong Domingo sa gabii.

Ang suspek nga si Rosano Pilapil, mag-uuma, giingong nagkalalis ug ang kapuyo nga si Conchita Canoy, 59, niadtong Domingo sa gabii nga niresulta sa pagpanunggab.

Si Canoy nakaangkon og samad dinunggaban sa iyang bukton ug daling gidala sa tambalanan sa iyang mga anak kinsa mao sab ang ni-report ngadto sa kapolisan apan ang suspek ang daling nakasibat.

Ang kapolisan nakarekober og usa ka hait nga hinagiban nga adunay gitas-on nga 15 pulgadas nga maoy gigamit sa suspek sa pagpanunggab.

Kasong frustrated homicide ang giandam sa kapolisan batok ni Pilapil. (BANAT NEWS)