CCPO nihatag og regalo sa mga batang sinagop
CEBU, Philippines — Nangapud-apod og mga regalo sama sa bag, sapatos ug pipila ka gamit sa eskwelahan ang Cebu City Police Office ngadto sa ilang mga foster children kagahapon sulod sa ilang kampo.
Kini kabahin sa pagsaulog sa ika-25 nga National Children’s Month.
Ang nakadawat mao ang 33 ka bata nga nag-edad og 5 ngadto sa 16-anyos.
Matud ni CCPO Director Joel Doria nga tipik lang kini sa usa ka milyon nga ganti nga nadawat niya human naapil sa 10 Outstanding Filipinos niadtong Agosto.
“Tinupad natin yung pangako natin na shoes, bags and school supplies natin para sa kanila,” matud ni Doria.
Ang maong mga bata gisagop sa kapolisan dili tungod kay mga ilo na sila sa ginikanan apan aron magiyahan sila sa ilang pagdako nga dili mahisalaag paingon sa ilang mahayag nga kaugmaon.
“Nalipay kay naa mi bag-o nga mga gamit labi na para sa eskwelahan,” matud ni Kyle, usa sa mga bata nga gisagop sa kapolisan.
Nagsugod ang programa niadtong 2012 ubos ni kanhi CCPO director Melvin Ramon Buenafe diin niabot og 50 ka bata ang ilang gisuportahan ug gipadayon na sa mga nagsunod nga director. (BANAT NEWS)
- Latest
