Halfway house gitukod

CEBU, Philippines — Gitukod ang Halfway House sa Barangay San Roque, Liloan aron kahatagan og kahigayunan ang pipila ka recovering drug addicts nga dili pa buot mobalik sa ilang lugar diin sila nagumon sa bisyo sa ilegal nga drugas.

Ang nagpatukod niini mao ang pangulo sa Love of God Community ug nagdumala sa Surrender to God (SuGod) Program sa Archdiocese of Cebu nga si Fe Barino.

Ang Halfway House kasamtangan nga gipuy-an sa dili mominus 11 ka recovering addicts kinsa wala pay salig sa ilang kaugalingon nga mobalik sa komunidad diin sila gikan human sila nigradwar sa SuGod Program tungod sa kahadlok nga basin og mobalik sa ilang bisyo.

Matud ni Barino nga ang mga recovering addicts dako og kausaban sa Halfway House tungod kay dili man kontrolado ang ilang lihok ug back to basic sila sa maong lugar diin gi-reformat pagbalik ang ilang kinabuhi human walay linya sa kuryente ug walay signal sa communications.

Ang mga recovering addicts adunay mga pag-ampo nga himoon sa buntag ug gabii ug mga gimbuhaton nga maka-busy kanila ug makapagawas sa ilang mga singot.

Gitug-an ni Barino nga pipila lang una ang nakapuyo sa Halfway House tungod kay kinahanglan man gyud nga adunay mokuyog sa mga recovering addicts dili lang professional apan spiritually capable usab nga makasabot sa kahimtang sa mga kanhi addicts.

Adunay mga seminarista ang makig-uban sa mga recovering addicts matag tapos sa semana aron magpahigayon og nagkadaiyang kalihukan.

Si Antonio Martil, spiritual companion sa mga recovering addicts sa Halfway House, nitug-an nga dili sayon ang journey sa mga kanhi addicts kay gikan sila sa lain-lain nga upbringing apan sa dili pa matapos ang adlaw ila gyud kining tukion ang mga wala pagsinabtanay.

Gitug-an ni Martil nga aduna nay nipuyo sa Halfway House ang nigawas na ug nibalik sa pagtungha samtang ang uban nitrabaho na aron adunay matabang sa ilang pamilya.

Usa ka recovering addict nga nagpuyo sa Halfway House nitug-an nga dako ang iyang pasalamat sa mga tawo nga gihimong instrumento aron sila magbag-o ilabi na nga mauwaw na siya nga dako na ang iyang anak.

Gitug-an sa maong ginang nga 25 ka tuig siya naulipon sa ilegal nga drugas ug nipuyo una siya sa Halfway House tungod kay dili pa siya mokompiyansa nga mobalik sa ilang lugar.

Buot niyang ipakita sa nag-inusara niyang anak ug pamilya nga aduna siyay kabag-ohan ug malinawon usab ang iyang pangutok nga naa siya sa maong lugar.

Ang ginang nangayo og pasaylo sa iyang anak kinsa gihulagway niyang dako kaayo og pag-antus dihang naulipon pa siya sa ginadili nga drugas.

Si Archbishop Jose Palma mapasalamaton sa managtiayon nga Lito ug Fe Barino tungod kay gihikap kini sa Ginoo aron maghuna-huna og mga tubag sa problema sa ilegal nga drugas ug sa natokhang.

Matud ni Palma nga nindot kaayo ang Halfway House kay nindot ang environment ug layo ang mga recovering addicts sa komunidad nga maoy hinungdan sa ilang pagamit sa ilegal nga drugas.

 Malaumon si Palma, nga adunay daghan pa nga tawo nga motabang alang sa mga naulipon sa ilegal nga drugas. (BANAT NEWS)