Gitulis, gipusil sa baba

CEBU, Philippines — Usa ka 35- anyos nga lalaki ang gipusil sa duha ka mga gipasanginlan niyang tulisan diha sa General Maxilom Avenue, Sitio Ponce Dos, Barangay Carreta ning dakbayan sa Sugbo niadtong Domingo sa gabii. Apan lahi ang nadiskubrehan sa kapolisan sa maong insidente.

Ang biktima giila nga si Lourde Villa Canillo, taga Danao City ug kasamtangang nagpuyo sa Sitio Agay-ay sa mao gihapong barangay nakaangkon og samad pinusilan sa baba nga milapos sa iyang liog.

Sumala pa sa hepe sa Police station 3 nga si Senior Insp. Jovito Labra nga ang alegasyon sa biktima nagbarog siya sa maong dalan dihang kalit nga giduol siya sa duha ka wa mailhing lalaki ug dayon gitiunan siya og armas.

Matud pa niini nga kuhaon unta ang iyang kwarta apan misukol siya apan gipusil siya sa iyang baba lapos sa iyang liog ug ang namusil daling nisibat.Dali nga gidala sa tambalanan ang maong biktima.

Apan base sa gihimong imbestigasyon ni Labra kini mitug-an sa mga tigbalita nga lahi ang gipanulti sa mga tawo didto sa crime scene. Matud pa nga drug transaction ang nahitabo ug dili pagpanulis.

Matud pa niya, gawas nga anaa ra ang P25 mil nga kwarta sa biktima, pirme usab makita sa mga tawo diha sa maong lugar.

Laing gibutyag sa maong hepe nga nahabilin ang gituohang motor nga gisakyan sa mga namusil human kini nahutdan og gasolina. Ang maong motor adunay plate number nga 3220 P2.

Atol ning pagsuwat sa balita, luwas na ang kahimtang sa biktima samtang  padayon pang giimbestigaran kun kinsa ang mga gidudahang durugistang nipusil sa biktima.

Samtang maghimo pa sila og dugang imbestigasyon kabahin sa hitabo, apan dili nila arestuhon ang biktima tungod kay wa may ebidensya bahin sa gipanulti sa mga tawo diha sa crime scene. (BANAT NEWS)