Hubog nagmaoy, nagpasalba

CEBU, Philippines — Gibalhug sa detention cell sa Liloan Police Station ang 39-anyos nga lalaki nga nagmaoy sa kahubog ug nagpabuto sa iyang armas human nakiglalis sa gikainom niyang silingan alas 3 pasado sa niaging Lunes sa kadlawon.

Si Police Officer 3 Renato Pendo sa Liloan Police Station niila sa suspek nga si Rodrigo Mendoza nga nagpuyo sa maong dapit.

Matud ni Pendo nga gikainom sa suspek ang pipila niya ka silingan apan dihang nangahubog kalit lang nitumaw ang mainiton nga panaglalis.

Kalit lang nibarug ang suspek sa iyang gilingkuran ug wala na lang mananghid sa gikainom niyang silingan nga mopauli na kini sa ilang panimalay.

Paglabay sa pipila ka gutlo kalit lang nahibalik ug walay daghang estorya nipabuto kini sa gidalang armas nga kalibre .45 nga walay lisensiya.

Wala hinuon ipuntariya og tawo ang pagpabuto apan nakapatibulaag kini sa mga tawo nga nangahadlok ug nalisang hinungdan sa pag-iyahay og panagan pahilayo sa maong lugar.

Ang mga sakop sa Liloan Special Weapons and Tactics (SWAT) Team dali nga niresponde sa maong dapit ug gidakop ang suspek dihang ilang nasuta nga walay lisensiya ang gihuptan niining  armas.  (BANAT NEWS)