Programa bahin sa basura ilusad

CEBU, Philippines — Gikatakda nga ilusad sa kagamhanan sa siyudad sa Sugbo ning buwana ang programa gitawag nga ‘Basura Ko, Obligasyon Ko’ nga makatabang sa problema sa basura sa dakbayan.

Nagkanayon si Konsehal Eugenio Gabuya Jr., Chairman sa Committee on Public Services’ ilahang na-obserbahan nga daghan og basura sa kadalanan ug ang katawhan wala’y oras nga gisunod sa paglabay sa ilang basura.

Pangitaon ang tanang mga hot spots diin ang mga tawo pataka lang og labay ug dunay uban nga dili makalabay sa ilang lugar tungod sa kagamay maong sa dalan na lang kini ibutang.

Ang siyudad mohatag og sakto nga oras nga pwede makalabay sa basura ug asang dapita, kadtong di motuman pasilotan sa ordinansa sa siyudad.

Ang mga Barangay Environmental Officers (BEO) ug Cebu City Environmental and Sanitation Enforcement Team (CESET) maoy gitahasan sa pagbantay.

Samtang pangayoan ang barangay officials og schedule sa pagkolekta sa basura kay mao kini ang basehanan sa honorarium nga ihatag sa Cebu City sa mga garbage loaders.

Sa paglusad sa maong programa motabang usab ang Land Transportation Office (LTO), Cebu City Transportation Office (CCTO) ug sa kapulisan alang sa ilang operasyon.

Giapil ang maong mga ahensiya tungod kay ilang nahibaw-an nga dunay mga pribadong sakyanan nga gamiton sa paglabay og basura, dunay mga trisikad sab nga matod pa suguon sa paglabay og basura.

Nasayran nga daghan og na-identify ang siyudad nga hotspot apan ang gihatagan una nila og pagtagad mao ang mga nag-unang kadalanan sa Cebu City.

Sa laing bahin mopahigayon na usab og public bidding ang siyudad sa Sugbo kalabot sa plano nga pag-abang sa mga sakyanan nga gamiton sa pagkolekta sa mga basura sa siyudad.

Gibutyag sa pangulo sa General Services Office Ronaldo Malacora gi-schedule pa og bidding ang pag-lease og mga sakyanan apan wala pay petsa sanglit ipasaka pa kini sa Technical Working Group sa Bids And Awards Committee aron ma-publish ug ma-schedule ang bidding.

Kini tungod kay nagsige pa ang preparasyon sa bidding documents ug kun mahuman kini diha pa kini ma-publish alang sa bidding apan sigon ni Malacora lauman nga sa buwan sa Oktubre ma-award na ang kontrata ug makasugod na kini.

Ang mga ekipo nga abangan gilangkuban sa napulo ka dumptrucks ug onse ka mga compactor trucks nga abangan og usa ka libo matag oras ug 24 oras ang operasyon sa matag unit.

Nasayran ang budget alang sa pag-abang sa maong mga trucks moabot sa P55 milyones ug ang kontrata niini sulod sa tulo ka buwan gikan sa Oktubre hangtod na sa Disyembre ning tuiga.

Kining maong abangan nga mga dump truck ug compactor trucks maoy mokolekta sa mga basura sa mga barangay samtang mga trucks sa bag-ong service provider nga mao ang Jomara Konstruckt Corp. maoy mohakot sa basura gikan sa transfer station paingon sa pribadong landfill. (BANAT NEWS)