EDITORYAL - Ayaw ilimod

Mapagarbuhon nga gipahibalo kaniadto ni kanhi mayor Michael Rama nga daghang kahugpongan sa mga lumolupyo, ingon man mga opisyal sa lainlaing estado didto sa Amerika, apil ang mga dagkong magpapatigayon dinhi sa nasud, nga misaad og tabang aron nga matukod dayon ang bag-ong Cebu City Medical Center (CCMC) building.

Gipahibalo kini ni Rama atol g’yud sa iyang pag-uli dinhi sa dakbayan gikan sa iyang usa ka buwan nga pagbisita sa kanasuran sa Estados Unidos atol sa iyang administrasyon.

Gipasigarbo dayon ni Rama ngadto sa publiko, pinaagi sa media, ang iyang kalampusan sa giingon niya nga pagpakilimos didto sa lainlaing kanasuran aron lang matukod ang bag-ong ospital sa dakbayan, nga ihulip sa karaang CCMC building nga iyang gipaguba.

Diha nga napilde si Rama sa eleksiyon kaniadtong 2016 ug mibanos na si Mayor Tomas Osmeña, nangita na ang mayor kon asa na kadtong gipasigarbo nga mga donasyon nga nakuha ni Rama. Ang kanhi mayor igo lang nga mipasabot nga pulos “saad” sa pagtabang ang iyang nakuha, ug wala g’yuy mihatag og kuwarta.

Sigun sa gipahibalo ni Rama atol sa iyang press conference kaniadto nga halos ang tanang andana sa 10-storey building, duna na’y miangkon nga sila ang moabaga sa gastohan sa pagpatukod.

Apan ang problema kay ang kanhi mayor nagdumili sa pagtug-an kon kinsa kadtong mga misaad sa paghatag og donasyon. Kon gusto man gani ni Rama nga makatabang alang sa katumanan sa pagpabarug sa bag-ong ospital, dili maayong ihinakog niya ang iyang lista.

Angay’ng kalimtan ni Rama ang politika nga siya napilde ni Osmeña sa miaging eleksiyon ug motabang siya aron makolekta ang kantidad nga ihinabang sa mao nga mga estado, mga dagkong magpapatigayon ug sa kahugpongan sa mga Sugboanong lumolupyo nga tua na nagpuyo sa Amerika.

Kon buhaton kini sa kanhi mayor, mas daghan pa ang modayeg kaniya kay sa ang ipatigbabaw niya mao ang pagdumot abi kay napilde siya sa eleksiyon.