Duha naaksidente, usa patay

CEBU, Philippines – Patay ang  wala mailhing motorista nga nabangga sa gikasugat nga multicab diha sa Barangay Yati, Lungsod sa Liloan samtang usa ka drayber sa trak ang naangol didto sa Oslob human natagak sa gimaneho niining trak sa bung-aw.

Si Senior Police Officer 2  Raul Presbitero  Flores nga maoy traffic investigator sa Liloan Police Station miingon nga ang wala mailhing motorista nagsakay sa itom nga motorsiklo nga nagdala sa plate number NG 21522.

Nagdagan kini gikan sa lungsod sa Consolacion samtang gikan ang multicab nga gimaneho ni Eveneser Huyad Son, 33, sa Lungsod sa Compostela kauban ang walo ka sakop sa ilang pamilya.

Matud pa ni Flores kusog ang panagbangga sa duha. Wala'y lisensya o ID ang  drayber sa motor kinsa patay na pag-abot sa Liloan Municipal Health Center.

Ang walo ka mga sakay ni Son nga naglakip ni Lilibeth Son, 50, Letecia Son, 53,  ug laing tulo pa ka mga kauban pulos nakabaton og mga bun-og sa ilang kalawasan ug gihatod sa tambalanan sa Dakbayan sa Sugbo.

Gipaabot pa sa kapolisan ang mga tagtungod sa namatay kinsa gihulagway nga taas og buhok, kasarangan ang panglawas ug gitas-on sa pamarog. Naa kini karon gipahiluna sa punerarya sa lungsod.

Sa laing bahin, naangol ang usa ka drayber sa 10-wheeler wing van human natagak ang iyang gimaneho ngadto sa pangpang sa Barangay Calumpang, Oslob.

Ang naangol mao si Nestor Renosio, 42, nga lumad nga taga Negros. Matud pa sa Desk Officer sa Oslob Police Station Julius Sumilhig lakip si Renosio nga nahulog sa pangpang kuyog sa iyahang gidrayban nga trak sa wala pa matinong hinungdan kay gidala kini sa tambalanan sa Dumaguete.

Sumala pa ni Sumilhig, padulong sa siyudad sa Sugbo si Renosio diin gikan kini  sa Victorias, Negros Occidental.  Ang sakyanan ni Renosio anaa pa sa ubos nga bahin sa pangpang nga naghayang. -/EIM (BANAT NEWS)