Ang kaso ng batang sinuspend ng School

PINAG-UUSAPAN sa Grade 3 science class ang tungkol sa balyena. Isang estudyante ang tumayo at nagkuwento tungkol sa isang karakter sa Bibliya, si Jonah, ay nilunok ng balyena.

“Gusto kong ikuwento sa inyo na balyena ang lumunok kay Jonah. Kuwento ito mula sa Bibliya.”

Ang titser ay nagkataong atheist na walang alam tungkol sa Diyos at sa Bibliya.

“Iha, kahit malaking isda ang balyena, hindi nito malulunok si Jonah dahil makipot ang kanilang lalamunan.” 

“Titser, kung babasahin mo po ang Bibliya, nakasaad doon na totoong nilunok si Jonah ng balyena at namalagi siya ng ilang araw sa tiyan nito. Pero dahil sa utos ng Diyos, siya ay isinuka ng balyena kaya siya ay nakalabas at nakaligtas”.

Medyo naasar ang titser dahil parang ipinamumukha ng bata na mas totoo ang sinasabi nito kaysa kanya na isang guro. Kaya nang magsalitang muli, matigas na ang kanyang tinig.

“A whale could not swallow a human; it was physically impossible.”

“Kapag po ako ay nakarating sa heaven, tatanungin ko si Jonah”

“Paano, kung sa impiyerno pala siya napapunta?’’ kontra ng titser habang nakapandilat ang mata.

“E, di ikaw na lang po ang magtanong sa kanya.”

Nahatulan ng dalawang araw na suspensiyon ang bata  dahil sa sagot niyang iyon. Pero nakipaglaban ang ina ng bata na hindi makatarungan ang iginawad na suspensiyon sa anak nito. Sumulat ang ina sa pamunuan ng eskuwelahan.

Katwiran ng ina sa sulat, lumaki ang kanyang anak na ang paniwala ay mabuting bata siya dahil lagi siyang nagsisimba at nagba-Bible study. Kaya naniniwala ang bata na sa heaven lang siya mapapapunta. Alam sa buong school na hindi naniniwala ang titser sa Diyos, masisisi ba nila ang kanyang anak at mga kaklase nito, na magkaroon ng impresyon, na hindi welcome sa heaven ang titser na ito? Since dalawang lugar lang ang pinupuntahan ng mga kaluluwa, maliwanag na sa impiyerno pupunta ang rejected sa heaven.

Nagtagumpay sa pagtatanggol ang ina. Binawi ang suspension sa bata at ang titser ay pinag-resign. Bad influence ito sa mga bata dahil sa kanyang paniwala.