Kampo ni Horn gusto og random drug test
CEBU, Philippines - Mangusog ang kampo ni Jeff Horn aron maimplementar ang ‘random drug testing’ kon ugaling madayon ang “rematch” tali sa wa’y pildeng Australyano ug ni Manny Pacquiao.
Segun sa taho ni Phil Lutton sa Sydney Morning Herald, ang trainer ni Horn nga si Glenn Rushton nagkanayon nga wala siya makontento sa post-fight drug test nga gihimo atol sa kontrobersiyal nga away.
Sila si Pacquiao ug Horn mipaubos sa naandan nga urine test human sa ilang sangka niadtong Hulyo 2 ug ang duha pulos nag-negatibo sa ginadiling matang sa droga.
Karon, si Rushton gusto og mas estrikto nga drug test sa rematch ug gisaytan niini ang Voluntary Anti-Doping Association nga mao kanunay ang mopahigayon og Olympic-style tests sa nagkadaiyang mga atleta.
“I’m very happy with any drug testing. I signed Jeff up for the WBC-VADA clean boxing program, which means you can be tested at any time. As an Olympian, we’re used to this sort of drug testing. We’ve had to do this many times. He's clean as a whistle,” matud pa ni Rushton.
Sa sinugdanan, gisalikway ni Pacquiao ang ideya nga i-drug test siya bisan unsang orasa sa iyang training camp kay lagi mahadlok siya og dagom. Gani usa kini nga hinungdan nganong hapit madiskaril ang ilang away ni Floyd Mayweather Jr.
Apan sa kadugayan miuyon ra ang Pinoy ring star hinungdan nga nadayon gyud ang ilang bugno ni Mayweather duha na ka tuig ang milabay.
Mao sab kini ang gusto mahitabo ni Rushton sa sunod higayon nga mag-abot ang dalan nilang Horn ug Pacquiao.
Si Horn mipilde sa eight-division world champion nga si Pacquiao pinaagi sa unanimous decision aron pagsakmit sa WBO welterweight title.
Sa miaging adlaw, gikompirmar ni Top Rank chairman Bob Arum nga adunay mahitabong rematch, butang nga gihandum ni Pacquiao. (BANAT NEWS)
- Latest
