Dispatser patay, gilabay-labayan lang

CEBU, Philippines - Gidunggab patay ang 23-anyos nga dispatser sa gikatahong rugby boy samtang natulog daplin sa dalan P. Gomez, Barangay Sto. Niño, Dakbayan sa Sugbo kagahapon sa kadlawon.

Alas kwatro sa kadlawon naalarmahan sa kapolisan ang biktima kinsa patay diha-diha dayon ug positibong giila sa kabanay nga si Joel Saavedra, taga Barangay Pasil.

Nakaangkon og duha ka samad dinunggaban sa iyang tangkugo ug usa sa iyang ubol-ubol ang biktima nga maoy hinungdan sa daling kamatayon niini.

Ang imbestigador nga si Senior Police Officer 1 Winston Ybañez sa Cebu City Police Office-Homicide Section niingon nga sa ilang inisyal nga imbestigasyon nasuta nga alas 9 sa gabii dunay gikaaway si Saavedra gumikan sa iyang pagbadlong sa usa ka grupo sa rugby boys.

Dihang gitan-aw ang CCTV footage, nasuta nga alas 12 sa tungang gabii samtang natulog daplin sa dalan ang biktima gidunggab kini sa usa ka ginganlan og Michael nga gituohang minor de        edad kauban ang laing duha ka wala pa mailhing lalaki.

Matud sa imbestigador nga posibleng kitchen knife ang gigamit sa pagdunggab tungod kay lawom ug lapad ang samad niini.

"Nakita gyud sa CCTV nga naa gyuy nangagi pero wa gyuy nakasumbong dayon. Makita ra man unta dayon kay duol sa poste (sa suga)," matud ni Ybañez.

Dugang pa niya nga gahi na ang lawas sa biktima dihang ila kining girespondehan.

Si Saavedra gibiyaan na sa iyang asawa ug anak hinungdan nga nag-inusara na lang kining matulog daplin sa dalan. (BANAT NEWS)