Tulo ka kaso sa EJK giimbestigar sa CHR-7

CEBU, Philippines - Nihimo og kinaugalingon nga imbestigasyon ang Commission on Human Rights sa tulo ka kasong pagpamatay nga naglambigit sa kapolisan sa buwan sa Hulyo.

Matud ni Leo Villarino, chief investigator sa CHR-7, nga ang tulo ka kaso gituohang may kalabutan sa extra-judicial killings (EJK).

Sumala pa ni Villarino nga niminus na ang gidaghanon sa mga reklamante nga modangop sa ilang buhatan ilabi na minus lang ang gustong mahimo nga saksi sa mga kaso may kalabutan sa pagpamatay ug susama nga normal na lang kini sa mga tawo.

Dugang ni Villarino nga maglisud gyud sila sa pagtuman sa 90 ka adlaw nga paghuman sa imbestigasyon may labot sa EJK tungod kay maglisud sila sa pagkuha og mga testigos.  Gitug-an ni Villarino nga mas sayon para kanila ang pag-imbestigar sa mga police operations kay makapangayo man sila og mga dokumento.

Si Villarino nipadayag nga mas hinay gyud ang ilang pagsubay sa mga gihuptan nila nga resulta sa imbestigasyon ilabi na usa na lang ka abogado nila ang mohimo sa pagtuon niini.

 (BANAT NEWS)