“Pangga” apps makaduda-PWC

CEBU, Philippines - Nagduda ang Cebu Provincial Women Commission (PWC) sa tinud-anay nga katuyoan sa mobile application nga nagtugot sa mga single o walay uyab nga babaye ug lalaki nga mo “renta” og tawo nga magsilbing kauban sa pipila ka okasyon.

Si Bise Gob. Agnes Magpale ang co-chair sa PWC nagkanayon nga  makaduda ang “Pangga” apps.  Ang “Pangga” nga mobile application usa kini ka mobile app nga gi-develop sa grupo nga gitawag nga Filipinos.

Ang maong app nagtugot sa mga single nga babaye o lalaki nga  maka-avail online sa ilang gustong makauban bugti sa bayad.

“Pangga offers friend for hire services for clients who want Pangga to portray a specific role in his/her distinct situation,” sigon pa sa maong application site.

Ang maong app nagtanyag og nagkadaiyang categories nga mapilian sa user sama sa social media boyfriend o girlfriend nga magsilbing “special someone” sa kliyente; rent a date sa mga social events, local tour guide, fitness buddy o bisan tawo nga mapahungawan og problema sa kliyente.

Sa maong app usab gisaysay nga adunay limitasyon nga angay ipatuman.

Mamahimo ra ang holding hands, pagmasahe sa kamot, pagdula og cards, tan-aw og movies ug selfies. Apan gidili ang paghalok (kissing) ug akbay ug uban pang dili maayo nga pamatasan. Ang developers sa maong app miklaro nga dili sila escort service. (BANAT NEWS)