Mandauehanon na lang ang pwede sa MCC

CEBU, Philippines - Ang mga estudyante nga lumolupyo sa dakbayan sa Mandaue mao na lang ang hatagan og kahigayonan nga makatungha diha sa Mandaue City College (MCC) nga nahimutang sa Mandaue City Sports and Cultural Complex sa Sitio Tribunal, Barangay Centro.

Ang maong kalamboan nalakip sa State of the City Address (SOCA) ni Mayor Luigi Quisumbing sa milabay’ng adlaw. Gipasabot ni Quisumbing nga  kabahin kini sa pagahimoon sa iyang administrasyon sa pagreporma sa MCC.

Ang mga Mandauehanon mao lamang ang makapahimulos sa pagtungha sa nahisgotang tulunghaan nga dakong sukwahi sa kasamtangan karong kahimtang nga ang 45 porsiyento sa  2,000 ka mga tinun-an wala magpuyo o dili lumad nga Mandauehanon.

Matud pa niya nga kadaghanan sa mga tinun-an sa MCC mga nagagikan sa laing mga lungsod o uban nga mga dakbayan ug pipila pa niini kanila mga taga Negros o gikan sa mga lalawigan sa    Mindanao.

Gipasabot niya nga ang kagamhanan sa dakbayan ang naggahin og mokabat sa P15 milyones ngadto sa  P20 milyones sa matag  tuig ug dili kini maki-angayon sa mga lumolupyo sa siyudad nga ang nakapahimulos niini gikan na hinuon sa laing lugar.

Gitataw ni Quisumbing nga ang suweldo sa mga magtutudlo sa MCC gikuha gikan sa panudlanan sa city hall.

Giklaro hinuon ni Quisumbing  nga ang mga tinun-an nga kasamtangan karon nga nagtungha sa MCC dili maapektohan sa maong kausaban tungod kay makapadayon man sila sa ilang pagtungha hangtud sa ilang pag-graduate.

Sa nasayran nga mokabat sa  1,192  ka tinun-an ang nagtungha sa MCC nga nahimutang sa complex  sa Sitio Tribunal sa Barangay Centro ug nagbayad lamang sila og P6,000 nga matrikula matag  semester. - /BDB) (BANAT NEWS)