EDITORYAL - Eksperto nga wa’y kabangkaagan

Wala’y kahadlok ug andam isakripisyo sa mga sundalo ug polis ang ilang kinabuhi alang sa kaluwasan sa katawhan ug sa nasud. Ang AFP ug PNP nakiggubat sa mga kaaway nga rebelde, mga kriminal ug karon kining bag-o mao ang terorismo. Matag kombati nga daghang makalas sa mga tropa sa gobiyerno, daghang manaway nga mura’g kinsa nga mga eksperto, apan sa pagkatinuod wala gani kabangkaagan sa mga gamit sa militar.

Nainpluwensya ra sila sa ilang nakita sa internet o sa mga balita nga nagpakita sa mga armas sa ubang mga nasud ug puwerte gyud nilang iboga. Matud pa sa uban, mas “high-powered” ang mga armas sa Maute, Abu Sayyaf, MILF , MNLF ug NPA. Maayo tingali nga klaruhon ni nga bisan og ipunon pa ang tanang armas sa mga kaaway sa gobiyerno dili kini makatunga sa armas sa gobiyerno nga anaa karon.

Himuon nato nga sanglitanan ang mga Armored Personnel Carriers (APC), dili ni tangke de-giyera. Susama kini sa gigamit sa AFP nga nangayaka diha nga gitirahan sa Maute didto sa Marawi City. Daghan ang nanaway kay nadutlan og bala. Mas maayo kuno kun mopalit og tangke. Siguro ilang gipasabot sama sa mga tangke sa Amerika nga Abrams, MBTs (main battle tanks). Ang APC may gibug-aton nga 10 ngadto sa 13 ka toneladas, samtang ang mga MBTs 50 toneladas pataas.

Natural mas baga ug komplikado ang composite armor niini kon itandi sa aluminum sa APCs, ug labaw sa tanan mas mahal. Apan kining mga hinawayon wala masayod niini. Labaw na nga wala sila masayod nga kadaghanan sa mga taytayan sa Pilipinas, 20 toneladas ra ang kapasidad ug kadaghanan naa sa kabukiran. Tinuod, daghang gamit sa Pilipinas mga surplus o second hand, apan bisan limitado ang budget, inutok nga namalit ang DND og mga gamit. Busa imbes tamayon, mas maayong dayegon ang sakripisyo sa AFP ug PNP kay kaluwasan kini sa tanan, apil na ang kaluwasan sa mga hinawayon.