EDITORYAL - Obo wala’y ngipon

Ang kagamhanan adunay gimugna nga mga balaod nga angay’ng sundon ug tumanon sa tanan, apan mag-unsa man ang maong mga balaod kun ang mga opisyal nga gitugyanan aron kini ipatuman, dili mohimo sa ilang katungdanan?

Kini maoy hinungdan nga maisip nga usik lang ang kuwarta nga gikan sa panudlanan sa kagamhanan nga gisweldo niining maong mga opisyal ug kawani sa gobiyerno nga wala magtuman sa ilang tahas.

Ang National Building Code of the Philippines, ingon man ang uban pa nga mga balaod, naglatid nga kadtong magtukod og mga building dili gayud unta mosugod sa pagtrabaho hangtod nga ang ilang plano sa pagamugnaong estraktura aprobahan sa Office of the Building Officials.

Dunay mga nagtukod og mga building, sama nianang anaa karon sa dalan V. Gullas, nga wala motuman sa balaod kabahin sa pagbutang og tukma nga “set back” kon luna gikan sa utlanan sa ilang property. Kanunay’ng gibalik-balik sa kadagkoan sa OBO nga dili sila makaato sa pagsuroy sa kinatibuk-ang siyudad aron susihon ang mga nakahimo og kalapasan.

Gidasig sa OBO ang katawhan nga motabang, pinaagi sa pag-report ngadto kanila kun may makita sila nga kalapasan. Tuod, gihimo kini sa pipila ka tawo nga nakabantay sa gihimo sa mga tag-iya niining maong mga gitukod nga estraktura sa V. Gullas, apan wala’y nahitabo ug nagpadayon ra ang katukoran sa proyekto.

Maisip ba nga wala gyuy ngipon ang OBO sa pagpatuman sa balaod, o kaha nagtinapulan ra gyud sila nga wala gyud motuman sa ilang katungdanan.

Ang kadagkoan sa OBO mipasa ngadto sa mga opisyal sa barangay aron nga pahunongon ang maong ilegal nga proyekto. Ang mga opisyal sa barangay wala sa’y gihimo aron nga pugson sa pagpahunong ang maong proyekto nga wala masubay sa balaod.

Karon, kinsa man diay ang angay’ng motagad niining maong problema nga mitabang na man unta ang publiko sa pagpahibalo sa kadagkoan sa OBO?