Paagi nga molugway ang kinabuhi (1)

Gikinahanglan ang paghimo og pipila ka kausaban sa istelo sa pagdala sa atong kinabuhi, kay dako kini nga tabang aron kalugwayan pa nga kita mabuhi. Karong bag-ohay lang, nadiskubrehan sa mga pagtuon, nga may 4 ka dili maayong kinaiya, sama sa panigarilyo o panabako, grabe nga moinom, wala’y ehersisyo, ug ang dili pagkaon og igo nga prutas ug mga utanon.

Matud pa, kining mga kinaiyaha maoy makapamubo sa atong kinabuhi. Tungod niini, angay nga samtang may katakus pa kita nga kini makorehian, buhaton na dayon ang kausaban aron kalugwayan pa og taas-taas nga makapahimulos kita sa kinabuhi nga malambuon ug malipayon. Busa sulayan nato kining mga mosunod nga paagi.

* Ayaw palabi sa pagkaon  — Kun gusto kita nga makaabot sa edad nga 100 ug himsog pa, ginagmay lang ang kaonon, nga sa tingkaon, kalkulohon nga 80% dili na magpabusog pa kaayo. Inighuman og kaon, hulata 30 mins una moinom og tubig, aron dili mobug-at ang tiyan. Kini aron sab paghatag og higayon sa asido, nga humokon para sayon na tunawon ang kinaon, nga ginagmay lang.

Ang St. Louis University researchers, nipamatuod sa ginagmay’ng pagkaon nga naglimit sa kaloriya aron pahinayon ang ‘T3 hormones’, nga maoy nagkontrol sa metabolismo sa kainit sa lawas ug sa pinitik sa kasingkasing nga kini mo-epekto ngadto sa tibuok lawas (physiology), ug hasta sab sa pagdako ug sa pagtubo.

* Aktibo permi — Sa pagseks nga matagbawon 2-3 ka beses sa  semana, makadugang na kini’g dagha’ng 3 ka tuig sa kinabuhi. Ang pirme nga naglihok ang lawas, mas makasunog og daghang kaloriya, sama sa 30 minutos nga paglakaw. Sa pagseks, moubos ang hayblad, maayo ang pagkatulog, imyun ug kasingkasing molig-on.