92 sikop sa anti-drug ops; minilyong shabu sakmit

CEBU, Philippines - Mipahigayon na sab og laing one time, big time operation ang Cebu City Police Office kauban ang City Investigation and Detention Management Branch, City Intelligence Branch, Special Weapons and Tactics ug 11 ka police stations, alas 2 sa hapon kagahapon diin 81 ka tawo ang ilang nasikop ug minilyon nga balor sa shabu ang nasakmit.

Matud ni PSIns. Narrolf Tan, ang Deputy Chief sa CIB nga gipangulohan ang ilang Intensified police operations ni PSupt. Ryan Devaras subay sa Oplan Project Double Barrel Reloaded.

Sa 81 ka nasikop, 33 niini nasikop sa buy-bust; 38 ang gidakop gumikan sa ilegal nga sugal; 2 ang naghupot og  armas ug 8 nasikop kay adunay warrant of arrest.

Nakunpiskar sab sa kapolisan  ang 107.54 gramos sa gituohang shabu nga mobalor og dul-an sa P1.3 milyones, 2 ka armas nga naglangkub sa kalibre 45 ug 38 ug mga bala niini. Duna say 2 ka moli-moli ug video karera machine ingon man dili mominos P3 mil nga kwarta nga gituohang halin sa ilegal.

Sa Dakbayan sa Lapu-Lapu, nadakpan sa Sitio San Roque sa Brgy. Pusok si Argie Godinez Tampus Jr. nga taga Brgy Canjulao. Gawas sa P200 nga buy-bust money, naghupot sab kini og P400 mil nga kwarta nga gituohang halin ug 12 ka gagmay’ng pakete sa shabu nga nagkantidad og P6, 664.

Laing nadakpan sa Sitio Casanta, Brgy Mactan mao sila si Aljer Bas taga Brgy Bankal ug Paquito Sisiban taga Brgy Opao, Dakbayan sa Mandaue. Sila nakuhaan og 10 gagmay’ng pakete sa shabu, P600 nga gituohang halin ug P200 nga marked money.

Nasikop usab sila si Erwin Oposaga ug Alferio Paquibot sa Sitio Soong 1, Brgy  Mactan ug nasakmitan og 3 ka medium sized pack sa shabu ug 5 ka gagmay.

Nadakpan usab si Vincent Yap alyas Binting nga taga Brgy Lorega-San Miguel, Dakbayan sa Sugbo ug nakuhaan og 10 ka gagmay’ng paketeng shabu ug P200 nga marked money.

Sa Siyudad sa Talisay, nasikop sa Sitio Litmon, Brgy Dumlog niadtong Miyerkules sa gabii silang Cris Rim nga nakuhaan og 4 ka gagmay’ng pakete sa shabu; Jonnee Brent Fernandez kinsa nasakmitan og 5 ka gagmay’ng putos; Erwin Badayos nga adunay 7 ka gagmay’ng pakete sa gituohang shabu; Renante Cabunag nga nagdala og 8 gagmay’ng putos; Lingjun Labajo nga nakuhaan og usa ka medium pack nga shabu ug ang 17-anyos kinsa nakuhaan og 5 ka gagmay’ng pakete. Nasayran nga motimbang ang tanan og 8 gramos nga adunay kantidad nga P94, 400.

Matud ni Talisay City Police Station chief PSupt. Emerson Dante nga nakadawat sila og taho bahin sa pagpamaligya og drugas sa usa ka Rayray sa nahisgutang lugar hinungdan nga ila kining gihimoan og operasyon. Apan nakabantay si Rayray ug nakasibat. Sa pagsibat niini, nasakpan nila ang unom ka mga dinakpan sa lugar hinungdan nga sila maoy nasikop ug nakuhaan sa mga nahisgutang ebidensiya dihang gipangrekisa. Rowena D. Capistrano, Gabriel C. Bonjoc ug Romeo T. Limpangog (BANAT NEWS)