Triathlon Festival sa Bantayan Island

CEBU, Philippines - Ang Bantayan Island mopahigayon og triathlon festival nga pagaulohan og “Tri-X” karong Abril 8 didto sa Sta. Fe Beach Club sa maong isla.

Gipasiugdahan sa Sugbutriathlon, ang triathlon festival  gilangkuban sa road ug mountainbike (off-road) triathlon uban ang mga individual races sa swim, bike ug run categories.

Ang off-road  naglangkob og 1K swim, 30K bike ug 7.5K run, samtang ang mga entrante sa road class kinahanglan mohuman sa  2-kilometer swim, 60K bike ug 15K run. Ang  riders nga moapil sa bike competition molatas sa rota nga  dunay distansiya nga 60K, samtang ang running event adunay 10K ug 5K categories ug ang mga partisipante sa swim event molangoy sa 2K open water course. Ganting salapi ug medalya ang nagpaabot sa mga top performers sa matag kategoriya. Ang registration fee sa triathlon event nagkantidad og P3,500 sa individual ug P7,500 sa relay team. Sa individual race ang registration fee nagkantidad og P500 sa swim, bike ug 5K run ug P750 sa 10K run.  Sa mga interesado nga mosalmot, mahimong magparehistro online sa www.race.ph. (BANAT NEWS)