Angat Buhay project gilusad

CEBU, Philippines - Kinse ka Local Government Unit (LGU) sa Probinsiya sa Sugbo ang napiling pilot area sa Angat Buhay project sa Office of the Vice President (OVP).

Sa habig sa amihanan ang mga pilot nga LGU gilangkuban sa dakbayan sa Bogo, mga lungsod sa Bantayan, Daanbantyan, Tabuelan, San Remigio, Tuburan, San Francisco sa isla sa Camotes, mga dakbayan sa Danao ug Mandaue.

Sa habig sa habagatan gilangkuban sa mga lungsod sa Argao, Barili, Dalaguete, mga dakbayan sa Naga, Talisay ug Carcar.

Ang OVP nakighiusa sa kagamhanan sa probinsiya sa pagpahigayon og usa ka adlaw nga pre-launching workshop ngadto sa mga LGU niadtong milabay’ng semana isip pangandam sa pormal nga paglusad karong Marso 7 sa Angat Buhay dinhi sa Sugbo.

Ang Angat Buhay initiative program kini ni Bise Presidente Leni Robredo diin tumong niini nga mahatagan og pagtagad ang isyu kabahin sa kakabus pinaagi sa pakigtinabangay sa mga LGU, national agencies, private sectors ug mga international ug local donors.

Si Georgina Hernandez, hepe sa Angat Buhay project nagkanayon nga atol sa formal launching niadtong buwan sa Oktubre 2016, giingong 50 ka municipal projects ang nakadawat og fund pledges gikan sa anti-poverty groups, multinational corporations, ug international ug local aid agencies.

Matud ni Hernandez nga atol sa paglusad sa Angat Buhay Cebu, ang mga LGU gipapresentar kini sa ilang anti-poverty program ngadto sa mga benefactors nga naglakip sa pribadong kompaniya, international ug local civic organizations.

Isip pagpangandam alang sa presentasyon, ang mga LGU gipaubos og workshop nga mag-aghat kanila sa pag-prioritize og mga plano nga makapakunhod sa kakabus sa ilang lugar.

Dugang ni Hernandez nga ang mga proyekto sa Angat Buhay naglakip sa food security, nutrition, edukasyon, rural development, women empowerment, universal healthcare ug housing and resettlement. - /DILT) (BANAT NEWS)