Koleksyon sa DVMF misaka ngadto sa P16M

CEBU, Philippines -  Mapagarbuhon nga gipahibalo ni Cebu City Veterinarian Alice Utlang nga bisan og nasirad-an ang ihawan sa dakbayan sa Sugbo, apan ang ilang revenue collection sa miaging tuig misaka gihapon ngadto sa P16.4 milyones.

Gitataw ni Utlang nga ang maong kantidad nakolekta gikan sa regulatory fees sa ihawan sa siyudad sa wala pa kini hingpit nga gisiradoan sa tunga-tunga sa tuig 2016, sa koleksyon nila gikan sa mga pribadong ihawan, regulatory fees alang sa mga karne nga itumod sa atong mga merkado, rehistro sa mga mangingihaw, ug rehistro sa mga iro ug iring.

Matud ni Utlang nga ang paspas nila nga pagpangsakmit sa mga karne nga gipalusot unta ngadto sa kamerkadohan maoy nakaaghat sa mga tigtumod og karne nga ila na gyud nga ipahiling sa mga sanitary meat inspectors ang karne sa dili pa dad-on sa merkado. Ang dakbayan sa Sugbo mokolekta og regulatory fees sa matag hayop nga mahiling sa mga meat inspectors aron sutaon kun haum pa ba kini nga kan-on sa tawo.

Daghan na nga mga karne ang gipangsakmit sa mga sanitary meat inspectors tungod sa wala pagtuman sa balaod, apil na ang pagdala sa karne nga ibutang ra sa sawog sa mga ordinaryong sakyanan.

Sa miagi lang semana, dul-an sa 200 kilos nga mga karne sa baka ug manok ang gisakmit sa mga meat inspectors nga gitumod na unta sa Carbon Market kay nabantayan nga dili haum nga kan-on sa tawo. Rene U. Borromeo (BANAT NEWS)