Trans-axial buot ipadayon gyud ni Davide

CEBU, Philippines - Si Gobernador Hilario Davide, III buot nga madayon ang trans-axial highway project nga dili makagasto ang gobiyerno. Sa sayo pa, gikataho nga ang maong proyekto dili kini matuman kay maapektohan niini ang mga watershed sa lugar nga maagian.

Apan si Davide subling mipadayag nga positibo siyang madayon ang paggama og super highway sa bukirang bahin sa Sugbo nga magsumpay gikan sa habagatan ngadto sa amihanan.

Ang maong proyekto gituohan nga makasulbad sa problema sa kahuot sa trapiko sa  kadalanan sa Sugbo.

Nanghinaot ang gobernador nga masugdan ang maong proyekto ubos sa iyang termino.

Ulahi sa milabay’ng tuig, dunay mga representante sa mga Chinese investor ang mibisita kang Davide ug mipadayag sa ilang interes sa proyekto.

Ang gobernador naghuwat nga ang maong mga investor mobalik nga duna nay dala nga positibong balita.

Matud ni Davide nga kun dunay interesado nga mopuhonan sa proyekto bisan ipaagi lang sa Private-Public Partnership apan pabor siya nga ang gobiyerno walay gasto sa proyekto.

Ang Japan International Cooperation Agency (JICA) maoy nagpahigayon og pagtuon sa proyekto ug giingong mao usab ang mibutyag nga maapektohan ang mga watershed nga maagian sa proyekto.

Dugang ni Davide nga ang JICA kanunay kining mitabang sa gobiyerno ug gihangop niya ang mga rekomendasyon. Apan kabahin sa ulahing isyu giklaro sa gobernador nga walay nahisgutan o komunikasyon ang JICA niini ngadto kaniya. (BANAT NEWS)