Seguridad sa sinulog kuwang pa

CEBU, Philippines - Nakuwangan pa si Cebu City Mayor Tomas Osmeña sa pagpangandam sa seguridad sa dakung kalihukan sa siyudad alang sa Sinulog 2017.

Usa ka general meeting ang gipahigayon kagahapon kabahin sa pagpangandam nga gihimo sa nagkalain-laing ahensiya sa gobiyerno aron ang Sinulog karong tuiga hapsay ug malinawon.

Personal nga nitambong sa maong meeting si Osmeña ug kini nagkanayon nga kuwang pa ang pagpangandam nga gihimo sa kapolisan ug kasundaluhan.

Una na nga gibutyag sa mayor nga ang improvised explosive device dili dayon mailhan kay ipahiluna man kini sa mga butang nga dili madudahan ug kini maoy gikabalak-an sa mayor maong iyang giawhag ang katawhan nga magmabinantayon.

Buot usab sa mayor nga dugangan pa ang pwersa sa 5,000 ka law enforcers nga ipakatap atol sa kalihukan.

Ang kapolisan sa ilang bahin bisan og wala silay direktang hulga nga nadawat sa seguridad sa Sinulog 2017 apan subsob ang ilang pagpangandam gumikan sa sunod-sunod nga nahitabong pagpamomba sama sa Hilongos, Leyte.

Si Chief Superintendent Noli Taliño, director sa Police Regional Office-7, niingon nga gikonsiderar nila ang pagpangatake sa teroristang grupo nunot na sa mga panghitabo sa ubang dapit sa nasud.

Gani nagplano sila nga magbutang og mga jamming device sa rota sa Sinulog grand parade aron kalikayan ang posibleng paggamit og IED. Gipasabot hinoon ni Senior Superintendent Joel Doria, director sa Cebu City Police Office, nga dili ang tibuok signal sa cell site ang mawagtang tungod kay daku kini og epekto ug kadto lang mga float nga moagi sa rota.

Gitun-an usab nila nga himoong dead spot ang tibuok Cebu City Sports Center aron malikayan ang pagpabuto og bomba sa teroristang grupo.

Si Konsehal Dave Tumulak, deputy mayor for police matters, niingon nga gihingusgan nila ang pagpahibawo sa publiko nga dili lang gyud magdala og bag.

Gipanawagan usab nila ang tanang volunteers nga tabangan sila aron mamentinar ang kahapsay ug kalinaw sa siyudad diin ang ilang buhaton mao lang ang pagpakig-alayon sa konsehal aron mahatagan sila og identification card ug mapaubos sila og pagbansay-bansay.

Samtang gipahibawo sa executive director sa Sinulog Foundation Inc.(SFI), Ricky Ballesteros, nga hugot sab nga gidili ang paggamit og drone atol sa kasaulogan tungod kay delikado usab kini nga makadisgrasya ug gikabalak-an nga basin og usa kini sa gamiton sa mga badlungon sa katilingban nga nagtinguhang samukon ang Sinulog.

Gipahibawo usab ni Ballesteros nga andam na sila alang sa umaabot nga launching sa Sinulog karong Enero 6 diin sugdan sa Santos nga Misa sa Basilica ug isunod dayon ang parade. (BANAT NEWS)