Prayer rally vs death penalty ug condoms giandam

CEBU, Philippines - Usa ka prayer rally ang ilusad agi og pagsupak sa planong pagpabalik sa silot kamatayon ug ang planong pagapod-apod og libreng condoms sud sa mga pangpublikong mga tunghaan dinhi sa nasud.

Ang maong rally himuon karong adlaw nga Miyerkules diha sa atubangan sa buhatan sa Department of Health-7 nga maoy nagpasiugda sa maong pagpanghatag sa libreng condoms.

Matud pa ni Rene Josef Bullecer, pangulo sa Human Life International aduna silay mga himuong programa alang niini aron mapasabot ang katawhan ug ang ahensya sa gobiyerno kabahin sa ilang pagsupak.

Giawhag ni Bullecer ang katawhan nga motambong sa maong kalihukan sa pagdala og rosaryohan lakip usab ang kandila.

Gitug-an ni Bullecer nga kini maoy ilang kaakohan sa pagpanalipod sa pagtoo ug aron ipakita nga bisan ang mga layko o matag binunyagang Kristiyano  mahimong mobarog batok sa mga sayop nga gipanghimo sa gobiyerno.

Karong adlawa sa alas -8 sa buntag adunay  Santos nga Misa ug pagbendisyon niadtong mga puya nga gipataktak ug wala na mahimugso sa kalibotan ug ingon man bendisyon alang sa mga inahan nga nagsabak diha sa Cebu Metropolitan Cathedral. (BANAT NEWS)