Mga ehersisyo sa masakiton og tuhod (1)

Ang pagkatandugon sa tuhod, gawas nga dinala kini sa pagkatawo (inborn),  segun sa mga eksperto niini, sagad nga gitumbok nga hinungdan niini mao ang dili maayo nga istelo sa atong linaktan.  Mabata o maedaran man, dili  gayud malikayan, dali ra manakit ang panuhod, kun dili nato ipraktis ang husto nga paglakaw ug pagdagan, hasta ang pagsul-ob og haum nga sapatos (orthotics).

Kinahanglang maseguro nga sa pagtugkad sa lapalapa, nakabalanse ni pagdawat sa gibug-aton sa lawas, kay kun dili maapod ang kusog sa unahan ug sa tikod nga bahin sa lapalapa, mauyog ang mga lutahan nga nahagtok sa pagtunob. Likayan sab ang paglukso-lukso o kiniat nga paglakaw, kay dali ra mabun-og o mahilis ang proteksyon sa mga lutahan (bone joints), labina sa tuhod.

Kun sa paglakaw nato, may mabatyagan ta nga puypoy o kapoy na ang tuhod, unya may mokalit mura’g gituslok o gikuryentehan ang bagtak, na-stressed na ang kaunoran ug kaugatan, nga kaabag sa pagpalig-on sa mga lutahan. Senyales kini nga morelaks una ug pamalandongon kun tukma ba ang paglihok sa atong tiil.

Ayaw paabota nga mosangpot sa kagrabe ang panakit sa tuhod.

Kun ugaling masakiton na gyud ta og tuhod, nga usahay motukar ang panakit sa tuhod, usa sa remedyo niini, mao ang paglig-on sa kaunoran ug kaugatan nga dili mabikogan. Mao sab kini ang mokupot sa kabukogan nga dili kita dali matakilpo. Kinahanglan mag-ehersisyo nga luwas ug dili mabug-atan ang tuhod. Igo-igo lang nga maundan o maunat (flexible muscles), sama niining mga paagiha;

* Magbarug nga moabay sa sandiganan sa silya —Unya molakaw-lakaw nga mura’g nagtulod og lingkuranan. Kalkuloha kutob sa mahimo, gikan 5-10 mins.