EDITORYAL - Usik ra’s kuwarta

Mas katuohan ang panglantaw sa ubang opisyal sa kagamhanan nga dili gyud masulbad ang problema sa paglunop sa downtown area sa dakbayan sa Sugbo pinaagi sa pagmugna og bag-ong sapa nga magsubay sa dalan Colon.

Gawas nga dili masulbad ang paglunop sa downtown area kun adunay uwan, mausik lang ang minilyon ka pesos nga kuwarta sa kagamhanan nga gastohon sa paghimo og bag-ong sapa nga maisip nga walay kapuslanan. May basehanan si Konsehal Joel Garganera sa iyang pagkuwestyon kun ngano nga dili man ang pagpalapad pagbalik sa Parian Creek maoy giuna kay sa paghimo og sapa?

Ang maong sapa nga gitawag kaniadto og Estero Parian lapad kaayo nga kasudlan gani og mga baruto nga de-katig gikan sa bukana niini sa dagat nga nahimutang dapit sa Pier 2.

Sa pagpanglabay sa daghang katuigan, ang lapad nga sapa nahimo na lang og maguwang gamay sa kanal tungod kay ang mga mapahimuslanong pamilya nga nagpuyo daplin sa tampi, mipalapad sa ilang kabalayan ug nakapagamay sa gidak-on sa sapa.

Ang nasudnong kagamhanan migahin og P700 milyones alang sa river restoration, kon pagpahibalik sa karaang gidak-on sa sapa, apan ang maong pundo nga salapi dili magamit mentras ang mga hingtungdang pamilya anaa pa sa ilang nahimutangan.

Matag higayon nga mobunok ang kusog kaayong ulan, maglunop dayon sa downtown area tungod kay ang tubig dili na man dayon makadagayday paingon ngadto sa dagat.

Tinuod, bisan pa og mahuman na ang gimugna karon nga sapa nga magsukad sa D. Jakosalem ug mosubay sa dalan Colon aron mokonektar sa sapa nga anaa magsubay sa dalan Junquera, dili kini makasulbad sa lunop sa downtown area.

Angay nga mentras karon pa, hinuktokan pag-ayo sa kadagkoan sa Department of Public Works and Highways (DPWH) kun angay ba nga padayonon ang proyekto nga gausik lang sa pundo sa kagamhanan.